SEB nagit 6,000 meter pintar deka dipasang nyentuk ujung taun tu

KUCHING: Sarawak Energy Berhad (SEB) nagit 6,000 meter pintar dipasang nyentuk ujung taun tu ari baruh ‘Projek Keterubah Meter Pintar’.

Dikena ngepunka, Gita dipilih nyadi kandang menua endur ngepunka dulu ngena 1,700 meter pintar deka dipasang berengkah bulan Mei tu.

Udah tu ila deka dipasang ba kandang menua Tabuan Jaya Baru/Tabuan Laru enggau Jalan Kempas nyentuk nyapai juluk 6,000 meter pintar.

Dikena meri kelala meter pintar ngagai raban bansa, SEB kilah ensana ngatur Karnival Mini ba Balai Komuniti Kampung Gita ditu berengkah ari pukul 9 pagi ngagai 5 lemai.

Karnival nya udah digulu Kaban Parlimen (MP) Petra Jaya, Datuk Seri Fadillah Yusof enggau Kaban Kunsil Nengeri (ADUN) Tupong, Fazzrudin Abdul Rahman,.

Fadillah lebuh dikerandau ba karnival nya madahka iya enggau Perintah Sarawak lebih agi nyukung pengawa SEB ti meri kelala meter pintar nya.

“Ngena meter pintar ari SEB tu ukai semina ulih meri bacha ti betul agi tang ulih meri mayuh penerang kelebih agi lebuh bisi penanggul bekal elekterik.

“Ukai semina SEB tang semua ejensi perintah mega patut betukar ngagai teknologi digital awakka ulih meri servis ti manah agi,” ku iya.

Meter pintar ti disikap ngena guna ‘pemeteran canggih’ awakka ulih macha meter ngena chara automatik sereta ulih matau bekal elektrik enggau lebih efisyen.

Pengelebih meter pintar iya nya bisi bacha meter ari jauh, bacha meter ti betul agi enggau nitihka jadual, lurus sereta penerang ti lengkas ngagai klien.

Mayuh aktiviti manah diatur nyerumba karnival nya baka pekit nyura anak mit entara umur empat ngagai lapan taun, enchabut tikit benasit enggau perais khas ngagai sida ti nyereta survei meter pintar.

Orang mayuh ke datai diperindang penyanyi tebilang, komedian sereta pematak randau Iwan Dasri sereta komedian ti tebilang di YouTube, Makcik Bawang Cempiyennn (MBC).