‘Dron’ deka dikena matau kes nunu nadai pemendar di nengeri tu
Perambu tu deka diperundingka perintah nengeri Sarawak dalam mutarka kes nunu nadai pemendar kelebih agi di Miri
MIRI: Perintah Negeri deka berunding senentang ngena teknologi ‘dron’ dikena matau lalu dikena mutar penanggul enggau isu nunu ti nadai pemendar di Miri.
Sapit Kepala Menteri, Datuk Amar Douglas Uggah Embas ti mega Chairman Komiti Ngatur Penusah Ngenyit Nengeri Sarawak madah, kelimpah nya perintah mega berunding deka ngaga mayuh agi pegung ‘tiub’ ba palan ti nadai ngembuan perengkaguna ti bansa nya.
Naka ke diatu Miri ngembuan sepuluh iti pegung ‘tiub’ lalu siti ari nya jai lalu enda ulih dikena.
“Siti chara baru dikena lalu benung diperundingka iya nya ngena mayuh agi ‘dron’ dikena ninjau palan ti bisi angus ketegal pengawa nunu enggau enda beradat.
“Sekeda endur palan nunu enggau enda beradat tu enda ulih dilawa lalu bekenaka ‘dron’ ulih ngemuntangka pengawa. Kitai (Komiti Ngatur Penusah Ngenyit Nengeri Sarawak) deka ngaga baum ba Kuching dikena berundingka chara mutar bekait enggau isu tu,” ku iya.
Uggah madah bakanya ngagai pemberita sepengudah tembu datai ngagai aum matau pengawa nunu enggau enda beradat ba mengeri tu ke diatur berapa buah ejensi perintah, ba Menara Tinjau Tudan ba ditu kemari.
Ku iya, perintah nengeri mega bisi merambu lalu bejuraika chara mutar pengawa nunu enggau enda beradat nya dalam timpuh ti panjai, kelebih agi ba bagi menua Miri lalu dipelabaka musim angat enggau kemarau tu deka nyadi ba ‘gelombang’ ti ke dua bulan September taun tu.
Bekaul enggau nya, Uggah, madah bantu jampat sepenyampau RM651,000 udah dikememendarka perintah menua dikena bejalaika pengawa mutar penanggul penusah nunu enggau enda beradat ba ditu.
Iya mega dekaka aktiviti ti terit senentang pengawa nunu enggau enda beradat tu dipejalaika enggau lebih agi lalu ngaga tinjau ngagau endur ti nyadi palan nunu enggau enda beradat.
Uggah mega muji enggau beterima kasih ngagai pengangkun enggau pengerajin sida ari opis pengerara api enggau penyah penusah Zon Miri ti udah begadai nyawa ngerara api ba kampung enggau babas ti nyadi ba Miri, pia mega dibantu sida ari raban Rejimen Askar Melayu DiRaja (RAMD) Kem Sri Miri, Angkatan Pertahanan Awam (JPAM) kerejasama ari ejensi perintah baka Opis Pengeraja Asal Enggau Rampa Nenua (NREB), Opis Rampa Nebua Opis Mineral enggau Geosains Sarawak (JMG).
Enggau nya mega, Ketuai Opis Pengerara Api enggau Penyah Penusah Malaysia Zon 6, Law Poh Kiong ba dalam jaku padah iya madah ka kes penusah nunu enggau enda beradat ba Kuala Baram udah ditutup ba jam 2 lemai hari lima tu tadi.
Ku iya, raban bomba madah ka anggar enda kurang ari 1,353 ekar palan babas enggau kampung tanah kerapa enggau ladang ba Kuala Baram udah angus.
Pemangku Kontroller Kualiti Rampa Menua, Justine Jok Jau, ba dalam jaku padah iya madah nyentuk sepemanjai timpuh kemarau ari Mac nyentuka ka 20 April, bisi sepenyampau empat kompaun udah dileluarka enggau empat iti surat tasat dibuka ngagai empat buah serikat dipelaba ngaga pengawa nunu enggau enda beradat tu.
Lalu Opis Rampa Menua JAS bisi ngeluarka semilan tagang ngagai orang ti ditemu ngaga pengawa nunu enggau enda beradat.
Sama bela bisi datai lebuh maya tu kemari, Menteri Muda Dagang Temuai, Seni enggau Main Asal Kaban Kunsil Nengeri (ADUN) Senadin, Datuk Lee Kim Shin; ADUN Piasau, ADUN Datuk Sebastian Ting; Datuk Bandar Miri, Adam Yii enggau Direktor Opis Pengerara Api, Penyelamat enggau Penyah Penusah Malaysia Nengeri Sarawak (JBPM) Khiruddin Drahmah, sereta tuai–tuai ejensi perintah bekait.
Siti chara baru dikena lalu benung diperundingka iya nya ngena mayuh agi ‘dron’ dikena ninjau palan ti bisi angus ketegal pengawa nunu enggau enda beradat.
Datuk Amar Douglas Uggah Embas Sapit Kepala Menteri