Penembu Jematan Long Lama nyungkak ekonomi di kandang menua nya: Dennis
LONG LAMA, Baram: Jematan Long Lama udah tembu digaga perintah nengeri Sarawak lalu udah dibuka ungkup mensia mayuh berengkah 18 April lalu nya siti berita ti manah ngagai sida ke diau ba menua pesisir kelebih agi sida ke diau di Ulu Baram.
Kaban Kunsil Nengeri (ADUN) Telang Usan Dennis Ngau madahka jematan nya pemanjai 573 meter lalu bisi ngembuan dua arus jalai nya udah tembu digaga nengah projek perintah Sarawak lalu ungkus ngaga jematan nya urung RM67,109,453.37 udah mai penyenang ngagai peranak ke diau ba Ulu Baram, lalu sida mega meri timbal ti manah ngagai projek nya laban nengah pemisi jematan nya ulih mai peluang enggau pemansang ba ekonomi komuniti ke diau ba kandang menua Long Lama, Apoh, Akah-Patah enggau Tutoh.
“Sida ke diau ba Ulu Baram enggau Telang Usan diatu berasai gaga ati enggau pemansang ari aku, pia mega tim Baram sereta Gabungan Parti Sarawak (GPS) ti udah dibai ngagai Telang Usan.
“Enti ukai ketegal pengangkun kitai deka mai pemansang ngagai Long Lama enggau Telang Usan, berengkah ari aku ke nyadi pengari rayat taun 2011, projek ngaga jematan tu engka enda dikereja nyentuk ke seharitu,” ku Dennis madah ngagai Utusan Borneo, lalu nambah jaku iya sebedau tu, semina mimiyt aja dipeda ketegal mayuh macam penanggul politik ba Telang Usan.
Enggau pemujur jematan tu tembu digaga, lebih ari 20,000 peranak ke diau ba kandang menua Long Lama, Apoh enggau Tutoh ulih terus ngagai Marudi sereta mengeri Miri enggau menua bukai ba Sarawak enggau nyamai ketegal enda agi bekena ka feri.
Dennis ngarapka penembu jematan nya, peranak ke diau ba menua nya ulih ngaga pengawa ti ngenataika penatai pemisi baka betanam betupi dikena nyungkak ekonomi sida.
“Aku arap nadai orang tauka nama nama parti nyadika isu tanah adat asal (NCR) lalu ngerachun runding sida ke diau ba menua pesisir ti meri penemu ke salah, laban sida ke diau ba menua pesisir ti nyukung perintah Sarawak agi deka ke pemansang di kandang endur sida ke deka napi penusah nya,” tambah iya.
Enggau nya, peranak ba Ulu Baram ngarapka jematan nya ulih mai ubah ngagai pasar Long Lama.
Chairman Nembiak Parti Pesaka Bumiputera Bersatu (PBB) Telang Usan Kunsilor Dominic Nyurang madah, peranak ba Long Lama dia udah lama nganti pemansang nya lalu jematan nya udah tembu digaga lalu ulih dikena mensia mayuh.
“Jematan nya beguna bendar ngagai peranak ditu lalu ulih mandak ka timpuh pejalai pia mega ulih ngelimatka belanja kelebih agi lebuh maya penusah ngenyit nyadi. Sebedau tu enti maya penusah ngenyit ti enda di sadang nyadi maya malam sida ngena belanja sampai beratus ringgit dikena mayar tambang feri nyemerai Sungai Baram laban nganjung bala sida ti sakit ngagai Miri.
“Penembu jematan tu mega mai ubah pendiau ngagai pasar ba Long Lama. Jematan nya nyadi tanda baru ba Telang Usan lalu ulih narit ati mensia mayuh datai ngelawa Long Lama,” ku iya.
Kunsilor Dominic madahka jematan nya ulih mai ubah enggau mai pemansang ngagai komuniti diau dia pia mega ulih nyungkak ekonomi peranak dia.
“Sida ke numbuhka kebun sawit kediri tauka bedandang mit ngasaika penyamai lenuh maya deka nyual asil sawit sida ngagai kilang ti semak dia. Nya ngemandak ka agi timpuh pejalai sida lalu nyimat ka agi belanja ketegal enda mayar tambang feri baka ke sebedau tu,” ku iya madah.
Penghulu ba Long Lama, Penghulu Desmond Yap, setuju enggau Kunsilor Dominic.
“Tu ketegal kitai, peranak menua ba Long Lama, Telang Usan enggau Ulu Baram, udah ngarapka semua utai tu taun tu. Kami meri besai terima kasih ngagai perintah menua Sarawak Kepala Menteri kitai ti dulu Niang Pehin Sri Adenan Satem ketegal pemanah iya udah ngemendarka peminta YB Dennis Ngau ti udah minta ngaga jematan lalu enggau nya kitai meda peminta kitai udah nyadi nyata.
Yap ingat ka peranak ba Long Lama ti udah napi mayuh macam penguji ketegal penusah ti beranjung bala ban belayan ti sakit ngagai Hospital Miri sebedau tu.
“Sebedau tu kami mega bekena ka bot nyemerai Sungai Baram. Lalu sepengelama 70 taun kami bisi di beri pemansang iya nya Jematan Long Lama,” ku iya ngujung jaku.
Maya ngenataika jaku iya lebuh pengawa bejadika Jematan Long Lama bedau lama ti udah, Pemesai Opis Pelilih Telang Usan Baru Tai meri terima kasih ngagai Dennis ketegal ti udah nyadi pengari rayat ti rajin.
“Nama-nama aja utai disebut orang ngenang iya,sekalika pait tauka manis, iya tetap nelan utai nya lalu neruska pengawa iya ti ngemansangka tTelang Usan Enggau Baram.
Seharitu nyadi pengingat ngagai Telang Usan,” iya nambah.
Lebih 500 iku mensia ti bisi datai lebuh pengerami nya, Nyengkaum Sekretari Politik Kepala Menteri Charles Balan Seling enggau Robert Ayu, Menijer Opis Kereja Raya Utara Wisil Lichok, Injiner Opis Kereja Raya Chong Chi Fam, Chairman kunsil pelilih Marudi Edward Mendai, Ketuai Kayan Temenggong Elizabeth Deng, Penhulu Desmond Yap enggau Kapitan Yeo Kee Siang.
Pengawa besai bejadijematan Long Lama dipelaba dipenyadi Kepala Menteri Datuk Patinggi Abang Johari Tun Openg ba bulan June lalu maya deka ditetapka.