SUPP Senadin, JPN Miri udah nerangka pemerat dokumen pengelala ngagai komuniti
MIRI: Parti Serakup Bansa Sarawak (SUPP) Senadin enggau Opis Pengerejista Bansa (JPN) Miri ngaga penemuai ngagai Kampung Lopeng Tengah enggau Kampung Senadin Jaya Hari Lima bedau lama ti udah.
Kaban Kunsil Nengeri (ADUN) Senadin enggau Menteri Muda Dagang Temuai, Seni enggau Main Asal, Datuk Lee Kim Shin madahka penemuai nya dikena meri informasyen pia mega madah ngagai bala ke diau dia senentang pemerat ngaga surat beranak enggau ngaga tingki (MyKad).
Lebuh maya penemuai nya, Affrizan Bujang ari Unit Mobil JPN Miri ngelalau senentang bakani chara deka ngerejista pengada enggau penanggul laun sereta enda ngerejista pengada anak.
Kelimpah ari nya nmega, sida dia mega dipadah senentang Bantu Endowment Sarawak (EFS) ti udah diberi ngagai nembiak peranak Sarawak ti ada taun tu lalu mega taun ti deka datai nyengkaum sida ti ada ba luar Sarawak.
Nitih ke atur sida ti bulih bantu tu, siku ari apai indai nembiak ti ada iya nya peranak menua Sarawak enggau status ‘K’ ba MyKad sida. Lebuh sida udah ada lalu direjista, anak sida deka nerima RM1,000 lalu deka dipansutka ngagai sida nyengkaum untung lebuh sida manggai umur 18 taun.
EFS ulih direjista ba sebarang opis JPN enggau apai indai peranak menua Sarawak ti beranak ba taun tu lalu bedau ngerejista EPS dilalau ngambika ngerejista ba opis JPN nyengkaum UTC.
Lebuh maya pengawa tu mega, Lee bisi nyua ka chek sepenyampau RM5,000 ngagai Komiti Pemansang enggau Pengelikun Pendiau Genturung (JKKK) Kampung Senadin Jaya, JKKK Kampung Lopeng Tengah enggau Surau Senadin Jaya.
Bantu nya diberi dikena sida ngatur pengawa ennggau aktiviti sepemanjai taun tu.
Ba pengawa ke bukai lebuh nemuai ngagai Kampung Senadin Jaya, Lee mega bisi bejadika paip gas ti baru tembu dipasang ba sembilan buah rumah ba Kampung Senadin Jaya.