Atur pemansang menua pesisir patut seriris ubah teknologi
Pekara tu patut disambut tuai raban bansa ti nyadi pengari perintah, nambahka pengelandik bekaul chara ti efektif megai rayat
SIBU: Atur numbuhka pemansang di menua pesisir patut diubah baru seriris enggau pemansang teknologi sereta pemansang industri kemaya dia.
Kaban Parlimen (MP) Lubok Antu Jugah Muyang madah, pekara tu patut ditimbal tuai raban bansa ti nyadi pengari perintah enggau ulih nambahka agi pengelandik enggau penemu bekaul enggau chara ke efektif megai rayat.
“Endang nyadi batang tuju perintah besai deka ngelengkaska agi pengawa numbuhka pemansang di menua pesisir ngambika seraka tikas pengidup enggau kandang mengeri ulih disempilka agi.
“Kitai meseti ngembuan timpai ke jauh sereta enda ngira nama penemu diri tang bekempit enggau pangan diri sama bela besaup mai menua mansang baka kitai di Lubok Antu ngambi pansut ari rintai 10 pelilih menua pemadu seranta di Malaysia,” pia ku iya madah.
Iya mantaika jaku tu maya Pengerami Begulai enggau Rayat di Rumah Empauk, Lubok Subong, Lemanak, Engkilili kena Hari Enam tu tadi.
Nambahka jaku iya baru, ku Jugah, tanggungpengawa pemesai perintah besai bekerejasama enggau bala tuai raban bansa ti nyadi jematan antara perintah enggau rayat bangat beguna dikena nentuka pemansang ulih digaga enggau lanchar.
Endang nyadi batang tuju perintah besai deka ngelengkaska agi pengawa numbuhka pemansang di menua pesisir ngambika seraka tikas pengidup enggau kandang mengeri ulih disempilka agi.
Jugah Muyang MP Lubok Antu
“Ukai semina nya aja, 75 peratus elawin tuai rumah dibayar perintah besai. Pia mega kitai ngarapka bala tuai raban bansa mengkang meri sukung penuh ngagai kitai dikena bejadika pelin enggau langgur pemansang perintah Pakatan Harapan (PH),” ku iya madah baru.
Pengerami sehari nya digulu lebih 250 iku peranak ari 13 buah rumah panjai kelimpah bala kaunsilor, tuai raban bansa enggau tuai rumah bela datai maya nya.
Jugah maya tu mega nyua geran sepenyampau RM45,000 ngagai Kaunsil Megai Komuniti Genturung Menua (MPKK) Rumah Empauk,
Kelimpah ari nya iya udah nyua geran ngagai 12 buah rumah panjai ke bukai maya pengerami ke sebaka di Rumah Saong, Nanga Kesit sebedau tu.