Enda mayuh orang lelaki ti beperesa Riman ‘Prostat’
KUCHING: Semina mimit aja mensia mayuh kelebih agi sida lelaki ke udah beumur beperesa ba sepital besai bekaul enggau penyakit Riman ‘Prostat’ ti nyadi penanggul ba pengerai sida.
Nitih ku Ketuai Pakar Perunding Kanan Urologist (Robotic & Laparoscopic Surgery) Dr. Teh Guan Chou madahka, penyakit riman tu lebih agi nuntung lelaki ti beumur dalam kandang umur 50 taun ke atas.
“Nitihka pansik kami ari Sepital Besai, sida lelaki ti udah manggai umur 50 taun ke atas deka suah agi kena igi penyakit tu.
Kebuah sida enda nemu penyakit tu bisi dikembuan ba tubuh diri, laban sida suah agi ngenatka pemedis nya lalu enda ibuh ka pengerai diri nyentukka sida berasai pedis isi ti enda ulih ditat.
“Berindik ari sida laun nganjung diri berubat, laban sida tu ngumbai pemedis nya semina enda lama aja lalu ngambi pemutus ngenatka pemedis ti diasai sida,” ku iya.
Nambahka nya, Teh madahka dua bengkah pekara ti nyasuh penyakit tu nyadi enti sema menyadi lelaki tauka apai sida bisi ngembuan penyakit Riman ‘Prostat’ sebedau tu, lalu siti pekara agi ti ngasuh penyakit tu nyadi iya nya ari peturun.
“Dua bengkah pekara ke ngasuh Riman ‘Prostat’ tu nyadi ba sida ke bisi menyadi lelaki enggau apai kala kena penyakit tu, sereta mega dibai ari peturun sida,” ku iya nambah.
Kelimpah ari nya, Teh nyaut timbal ari sida pemberita madahka, enti penyakit tu ditemu ba renggat keterubah enggau renggatduadekangemuntangka agi raban di sepital besai ngenyuman penyakit tu enti dibanding ari renggat ketiga enggau keempat ti mar agi disuman.
Chara bala sida lelaki ti deka nemu enggau silik agi senentang penyakit tu iya nya sida diasuh ngaga peresa ‘Prostate Specifik Antigen’ ke diperesa ari ai kemi sida.
Pia mega, chara deka nyuman enggau ngubat penyakit tu iya nya ngena chara muntas ngena radiasyen.
“Penyakit tu enti ditemu enggau tumu ke dikumbai kami dalam renggat satu enggau renggat dua muntang agi chara deka nyuman enggau ngubat penyakit tu. Tang enti ditemu ba renggat ketiga enggau keempat penyakit tusah deka disuman.
“Sida ke lelaki ulih mega meresa pengerai sida bekaul enggau penyakit tu ba Sepital Besai lalu chara sida deka nemu status pengerai sida iya nya ngaga peresa ‘Prostate Specifik Antigen’ ti diambi ari ai kemi sida ke beperesa.
“Enti sida ditemu bisi ngembuan igi penyakit tu, dia sida deka diperubat ngena chara buntas ngena radiasyen nitihka pemadah ari doktor,” ku iya bejaku kilah ensana.
Kimpin Pemereti Ati Bekaul Prostat udah dipenyadika ba Sepital Besai Sarawak ba Klinik Urologist enggau Gynecology.