Dua projek besai di Oya deka diteruska perintah besai
MUKAH: Dua projek pemadu beguna ti udah dilanggur sebedau tu ba Oya deka diteruska sida perintah besai.
Menteri Pengintu, Pengelantang Komuniti, Indu Ruang Bilik enggau Pemansang Nembiak Dato Sri Fatimah Abdullah Madah, projek nya dikena nyeliahka tanah tusur semanjai tebing pantai Oya enggau mega koridor Tebing Sungai Oya.
“Kitai meri terima kasih ngagai perintah besai ketegal ti udah setuju neruska dua iti projek ba alai kitai tu,” ku iya lebuh maya bejadika Perasmian Kaul Oya ba Pantai Tugik kemari.
Nitih ku iya,kededua projek nya beeguna bendar laban bekait enggau pengelikun peranak ke diau ba endur nya.
Taja pia, senentang ungkus tauka agih belanja tumu agi bedau ditemu.
Ungkus dikena nyeliahka tanah tusur tu dipelaba sepenyampau RM 19.55 juta lalu projek koridor Pekan Sabtu Oya beungkus RM 4 juta keterubah nya suba.
Enggau nya, projek nya mega dipadah iya beguna bendar dikena ngemanah ka Pantai Tugik dikena ngatur pengerami Pesta Kaul ti diintu ninting taun.
Pesta Kaul nya beguna amai diintu ungkup sida bansa Melanau.
“Enti ukai adat enggau main asal, sapa meh bansa Melanau, enggau nya kitai patut neruska pengerami Pesta Kaul tu diintu,” ku iya.
Taja bakanya ku iya, bisi mega adat ti ningkah ari pengarap ti udah enda diingat agi baka nganjung ‘Serahang’, tang enti nitih ke asal nya ‘Kaul’ nya nyadi siti pengerami dikena kitai betemu.
Kelimpah ari betemu begulai, nya mega nyadi tanda penyerakup bansa Melanau ti mega sama begulai ngemansangka ekonomi.
Lebuh maya pengerami nya mega,Fatimah bisi nyerah ka sepenyampau RM10,000 ngagai komiti pengerami nya enggau RM65,000 ngagai Opis Amanah Kebajikan Islam Dalat dikena ngaduka jalai ngagai pendam Dalat.
Sama bela datai Chairman Komiti Pingerami Kaul Oya ke mega Tuai Kunsil Opis Pelilih Mit Dalat Mukah Abdul Kadir Jamil, Residen Mukah Hamdiah Bakir, Sekretari Mendam Menteri Pengelantang, Pendiau Komuniti,Indu,Ruang Bilik enggau Nembiak Dr Saadiah Abdul Samat enggau Pemesai Pelilih Mit Dalat Kueh Lei Poh.