Julius endang nyukung chalun ke dipilih nyadi Presiden PBDS Baru
SIBU: Chairman Parti Bansa Dayak Sarawak Baru (PBDS Baru) Sitak Tengah Julius Enchana endang nyukung barang sapa ke dipilih nyadi presiden PBDS Baru sepengudah penuduk nya puang ditinggalka niang Cobbold John.
Penuduk nya nyangka deka diisi maya Aum Besai Tiga Taun Sekali (TGM) parti nya ke deka diatur kena 18 May ti deka datai.
“Sapa-sapa ke nyadi presiden meseti disukung seagi iya bejakuka ke Dayak Agenda kelimpah orang ti chakah ngeringka hak Dayak ba tanah adat Bumiputera (NCR),” pia ku iya maya ditanya pengarang berita sentang pekara nya, kemari.
Dulu agi ari nya, iya enggau raban pati parti sida datai nyuaka tulung ngagai indai niang Ex-Tuai Rumah Ramau Kanyau iya nya Nagi Galang di Maong, Kanowit.
Ku Julius madah baru, maya TGM nya ila, iya mega enda betanding ba sebarang penuduk ke bukai.
“Kebuah pia laban aku deka meri awak ngagai sida ke tuai agi ngemujurka singkang parti tu,” ku iya nerang.
Taja pan baka nya, iya ngarapka bala raban parti sida anang mending ke sebarang berita sebubu ngapa bekaul enggau pekara nya.
“Aku minta bala kaban dalam parti tu anang guai pechaya ke jaku ti enda tentu pengamat enti ukai jaku datai ari pemesai parti,” pia ku iya madah.
Niang Cobbold midang kena 7 Mach taun tu tadi, dikelala siku bansa Dayak ti liat ati ngetanka hak Dayak ba tanah sereta endang ransing meri penerang bekaul enggau Kod Tanah Sarawak enggau nama empas Seksyen 6 ba sida ke beempu tanah di serata Sarawak.
Kelimpah ari nya, niang chakah bendar ngangkatka PBDS sekumbang ke udah dipadu megai pengawa nyadi presiden kenyau ari taun 2016 sereta mujur ngerembaika PBDS nyentuk datai di Kapit, Sibu, Kuching, Sri Aman, Serian, Miri, Lundu, Selangau, Saratok, Telang Usan enggau menua ke bukai.
Bekaul enggau pengawa nyuaka tulung nya, ku Julius, niang Ex-Tr Ramau tu iya nya bini ngagai niang Ex Kaunsilor Gawing suba.
Niang Gawing ku iya, siku orang tampak rita ngeringka PBDS ke dulu suba serambau enggau Datuk Gramong Juna sereta Raymond Sabang maya nya.
“Tulung kitai tu taja iya mimit tang ngelai kaul antara raban seraya dikena kita ngenang basa niang enggau sida sebilik ti bebendar nyukung PBDS suba,” ku iya madah baru.
Niang Gawing nyadi kunsilor ba Opis Kaunsil Pelilih Kanowit ba taun 2004-2006.