Sarawak mayuh pengelebih dipilih endur beranakka puku
Laban perintah besai enggau Perintah Sarawak bisi nyendiaka sekeda insentif chukai enggau insentif ukai chukai
KUCHING: Sarawak bisi pengelebih ti besai agi sereta palan di Malaysia ti suah dipilih pemeranak puku endur beranakka puku.
Sapit Kepala Menteri, Datuk Amar Awang Tengah Ali Hasan madah, nya berindik ari perintah besai ti bisi nyendiaka beberapa insentif chukai baka Pioneer Status tauka elawin chukai pemeranak puku enggau elawin beranakka puku baru, kelimpah ari Perintah Sarawak bisi nyendiaka beberapa insentif ukai chukai.
“Sarawak nyendiaka mayuh pengelebih ti besai agi enggau tegap nyadi entara palan ti pemadu dipilih endur beranakka puku di Malaysia.
“Lalu kitai enggau konsisten ba penuduk Ke-3 pemadu tinggi dalam timpuh lima taun ke udah.
“Sarawak nyendiaka beberapa insentif ukai chukai ti nyengkaum baka nyendiaka bekal kuasa karan ngena rega ti kompetiti f(pemadu murah di menua tu) enggau tanah ke udah bisi disediaka endur projek ngena ungkus ti patut sereta pinta penetap ti fleksibel,” ku iya seraya madahka pemeranak puku ke ulih nembuka projek dalam timpuh ke udah ditetapka deka bulih premium.
Awang Tengah ti mega Menteri Pemansang Industri enggau Orang Dagang mansutka pekara nya lebuh bejadika Woksyop Ekonomi & Licha Polisi Kerejasama Entara China enggau Sarawak, ti diatur ba sebuah hotel ditu, kemari.
Bejaku baru, iya madahka Sarawak mega nengeri ti pemadu stategik bisi penyambung langit enggau tasik ti manah enggau menua besai.
“Adap ke utara kitai bisi ekonomi besai di dunya baka China, Jepun enggau Selatan Korea lalu ke timur kitai bisi India sereta ke selatan kitai bisi Austrlia.
“Sarawak enggau naka ulih deka nyadi palan dipilih endur beranakka puku. Pemesai ari opis menteri aku sedia ngemudah nyema pemeranak puku begunaka bantu enti deka beranakka puku di Sarawak,” ku iya.
Dulu ari nya, Awang Tengah madahka Sarawak seruran ngelaluka pemeranak puku ari dalam enggau menua luar, kelebih agi ba industri ti ngemeranka teknologi moden ke pemadu baru, sereta bisi penemu dikena mantu ngangkatka kaul dalam ekonomi dunya.
Sarawak mega nerima pemeranak puku ti ulih nempa orang ti kereja bepengelandik tinggi nengah pengawa mindahka teknologi lalu ukai gaji baru enggau pengereja pengawa ti intensif, ku iya.
“Kitai mega nyambut manah pemeranak puku ke numbuhka industri bukai ari produk asal ti mungkur penyereta ari komiti dagang menua tu, kelimpah ari pemeranak puku ke ulih meransang tauka ngelakuka penegap, teknologi gadung sereta beratka endur pendiau,” ku iya.
Lebuh ti ngenang pasal kerejasama enggau China, Awang Tengah madahka menua nya nyadi bakih dagang besai Sarawak enda ngira sekalika dalam pengawa ekpor enggau import.
Ba taun 2018 ku iya, dagang Sarawak enggau China nambah 16.8 peratus ngaga RM18.91 bilion lalu tu mer 13 peratus ngagai penyampau dagang Sarawak.
“Produk tauka barang eksport ke pemadu mayuh ngaga menua China baka ‘Liquefied Natural Gas (LNG)’, minyak sayur (CPO), isi injin enggau kereban lekterik.
“Lalu barang import ke pemadu mayuh ari China baka produk kimia, ‘lignit’, karbon enggau ke bukai,” ku iya t mega Menteri Pemansang Mengeri enggau Pengeraja Asal II.
Sama bisi datai ngagai pengawa nya kemari Konsul General of the People’s Republic of China di Kuching, Cheng GuangZhong, Menteri Muda Pemansang Orang Dagang enggau Dagang Mit & Jelan Pemesai (SME) Datuk Mohd Naroden Majais enggau ke bukai.
Sarawak nyendiaka mayuh pengelebih ti besai agi enggau tegap nyadi entara palan ti pemadu dipilih endur beranakka puku di Malaysia.
Datuk Amar Awang Tengah Ali Hasan Sapit Kepala Menteri