Kapit deka mansang enti padang bilun di Tunoh udah digaga
KAPIT: Kapit enda agi tinggal pemansang laban perintah nenegri deka ngaga palan penyangkai bilun ba Tunoh dalam pelilih mit Bukit Mabong.
Kepala Menteri Datuk Patinggi Abang Johari Tun Openg madah pengawa ti deka ngaga penyangkai bilun ba baruh Ejensi Pemansang Ulu Rajang (URDA) lalu dipelaba deka dbernegkah digaga ujung taun tu ila.
“Palan penyangkai bilun dmuka kandang menua (Kapit) nengah jalai langit.
“Tu deka meri pemanah ngagai pemansang betanam betupi pia mega ngagai pengawa dagang temuai ba menua ulu Rajang,” ku iya madah ngagai pengarang berita udah ke datai ngulu aum Komiti Pemansang Koordinasyen Sarawak ditu kemari.
Abang Johari madah, ungkus ngaga palan penyangkai bilun nya lebih ari RM100 milion.
Projek nya, meri penguntung ti besai ngagai menua Kapit lalu mega menua tu enda jauh agi dilawa.
“Kapit dalam 10 taun ke deka datai ldeka mansang laban aku melaba mayuh jalai deka nyambung Kapit ngagai Belaga.
“Nya reti Kapit enda jauh agi dilawa. Lalu nya nyadi ba tengah batang jalai ke bukai ti nyambung Kapit ngagai Sibu enggau Kapit ngagai Baleh enggau Belaga terus ke Bintulu,”ku iya.
Dulu ari nya, iya madah sepenyampau RM2.7 bilion udah dikemendarka ungkup Kapit ke alai RM550 milion ungkup projek mensia mayuh dikena nyambung bekal ai enggau elekterik.
Iya mega madah ungkus sepenyampau RM770 milion dikena ngemujurka 51 bengkah projek di Kapit ari baruh Pelin Pemansang Malaysia Lumpar ke-11.
Lalu ungkus sepenyampau RM1.5 bilion diberi ngagai URDA ti dikena ngemansangka menua Kapit enggau sekeda menua di Kanowit ke ari baruh pegai bagi menua Sibu, ku iya.
Ba aum pengarang berita ti sama, iya ngungkup bantu ngagai 42 pintu rumah panjai ba Palan Pengentap Pendiau Uma Bawang ba Sungai Asap ti dituntung penusah angus bedau lama ti udah.
Tetiap pintu deka nerima bantu sepenyampau RM70,000, ku iya.
Abang Johari udah nya bisi ngabas empat bengkah projek ti benung digaga di Kapit udah tembu aum nya.
Projek ke benung digaga iya nya jalai pansut baru Sepita Kapit, ngemanahka agi Kubu Lily , ngemanahka agi pasar Kapit enggau projek ngemanahka tebing ai menua Kapit.
Penembu projek tu ila deka ngemanahka agi rampa menua Kapit lalu ulih narit ati bala temuai.
Ba penemuai iya, Abang Johari disempulang sapit iya, Datuk Amar Douglas Uggah Embas enggau Tan Sri Dr James Jemut Masing, Sekrateri Menua Tan Sri Morshidi Ghani enggau Kaban Parlimen Kapit Datuk Alexander Nanta Linggi.
Sama bela datai mega, Penulung Sekretari Nenger Datu Jaul Samion, Menter Pemansang Api enggau Ai Datuk Stephen Rundi,Menteri Pengelantang Pendiau,Komuniti, Indu Ruang Bilik enggau Pemansang Nembiakt Dato Sr Fatimah Abdullah,Menter Muda Bekal Ai Datuk Liwan Lagang, Menteri Muda Undang-Undang, Menua enggau Perintah Besaia Sharifah Hasidah Syed Aman Ghazali Kaban Parlimen Hulu Rajang Datuk Wilson Ugak Kumbong, Pengari Rayat Pelagus Wilson Nyabong Ijang, Pengari Rayat Bukit Goram Jefferson Jamit Unyat, Pengar rayat Katibas Datuk Ambrose Blikau Enturan enggau Pengari rayat Murum Kennedy Chukpai.