Penanggul suntuk ai ba kandang menua Tinjar deka diputar nengah Projek Rayat Tinjar Fasa 2

KUCHING: Projek Rayat Tinjar Fasa 2 udah dipasukka dalam Langgur Pemansang Malaysia Lumpar Ke-11 (RMK11) ari baruh Opis Menteri Pemansang Menua Pesisir (KPLB) Malaysia dikena mutarka penanggul bekal ai ba kandang menua Tinjar enggau ke ngelingi nya.

Nya penerang timbal Opis Menteri Utiliti sereta Opis Bekal Ai Menua Pesisir (JBALB) Sarawak, bekaul enggau penyuntuk ai beresi dalam kandang menua Tinjar kelebih agi ba Kampung Bukit Limau, Long Tuyut enggau Menok.

“Genturung pendiau ti dipadahka dalam ripot surat berita nya nadai disambung paip ai.

“Taja pia, Kepala Menteri Sarawak udah ngemendarka ungkup belanja sepenyampau RM70 juta ari baruh Projek Rayat Tinjar Fasa 2 maya nemuai sereaa bejalaika pengawa iya ke Tinjar kena bulan Mac tu tadi enggau tuju ngenyampatka projek nya.

“Projek Rayat Tinjar Fasa 2 mega deka mungkur pengawa nyambung paip ke Kampung Bukit Limau, Long Tuyut enggau Menok ti dipelaba berengkah bulan Jun 2019,” ku penerang nya kemari.

Pengudah projek nya tembu ila, peranak ba kandang menua nya deka bulih pemaik ari bekal ai beresi.

Kelimpah ari nya, Perintah Sarawak nengah JBALB benung ngaga Projek Rayat Pakej Kandang Menua Utara 2 (NR2) nganti ngena paip baru ba kandang menua Lapok enggau Tinjar.

Projek nganti paip udah berengkah bulan Mac taun tu sereta dipelabaka tembu pun taun 2020.

Lalu inisiatif lengkas, JBALB bagi menua Miri deka nganjung ai beresi ngena tangki ngagai penguna ba genturung pendiau nya.

Penguna ba kandang menua nya mega ulih minta bantu ai mineral ari Opis Pengelantang Pendiau Raban Bansa (JKM).

Berindik ari pekara nya, Opis Menteri Utiliti ASarawak sereta JBALB Sarawak amat komited nentuka semua isu enggau penanggul bekal ai diputarka enggau lengkas dikena ngenyenangka rayat ngereja pengawa ninting hari.

Nyema bisi penanggul bekal ai tauka peminta ngajung ai tau betelefon ngagai opis JBALB Bagi Menua Miri nengah lumur 085-442204.