Ali: GPS ukai ‘hero’ ngetanka hak enggau pengelebih Sarawak

KUCHING: Pengudah milih enda ngundi Rang Undang-Undang Konstitusyen 2019, Kaban Parlimen ari Gabungan Parti Sarawak (GPS) dipadahka nguji nyadi ‘hero’ ngetanka hak enggau pengelebih Sarawak.

Mandal Presiden Parti Keadilan Rakyat (PKR) Ali Biju madah, diatu 19 iku Kaban GPS nguji nyaruka runding rayat sereta madah pekara bukai enggau juluk ngarapka ulih ngelimpangka ari isu kebendar.

“GPS enda talukka rayat sarawak kena 9 April lalu mayuh dalih bakani chara pan enda ulih mulaika ‘pengerusak’ ditapi Sarawak.

“Fakta ulih nerangka nya kediri empu lalu GPS enda ulih ngelalaika fakta tu,” ku iya nengah siti penerang, kemari.

Nitih ku iya, Pakatan Harapan (PH) diatu setuju enggau GPS deka numbuhka Komiti Pilih Parlimen pasal Sempekat Malaysia 1963 (MA63).

“Kitai nganti nama kebuah GPS dikena ngelubahka pekara tu,” terang iya.

Ku iya, tuju PH bejuraika rang undang-undang nya dikena mulaika baru entiti asal Malaysia baka ke sebedau taun 1976 ti nyerangkung Malaya, Sabah enggau Sarawak.

Tu singkang keterubah ti patut dipejalaika bererenggat dikena mulaika baru hak enggau pengelebih Sarawak enggau Sabah, ku iya.

Ulah enda ngundi GPS dip adahka iya semina agenda politik sida dibandingka nguji ngetanka hak enggau pemerat rayat Sarawak enggau Sabah.

Ali ti mega Kaban parlimen Saratok mega deka nemu nama kebuah Kaban Parlimen GPS ti sebedau tu perintah maya begulai enggau Barisan Nasional (BN) enggai ngubah konstitusyen.

“Tu pekara ti amat ke alai GPS nguji ngambika rayat Sarawak enda ingat. Balat ngenyinuka ati lebuh sida ngelama tu enda ulih ngintu hak Sarawak sereta enda tau ngumbai diri nyadi hero.

“Sida nemu tu deka nyadi seterum lebuh pengawa bepilih nengeri diatur ba taun 2021,” ku iya.