Menua China gagit bekerejasama enggau Sarawak numbuhka ‘digital silk road’
KUCHING: Menua China majak gagit nempa kerejasama enggau Sarawak ba pengawa numbuhka ‘digital silk road’.
Konsul Jeneral Republik China di Kuching, Cheng Guangzhong madahka menua sida benung jampat mansang dalam ekonomi digital.
Iya madahka bida pemesai tanah tauka rampa menua entara kededua menua China enggau Sarawak, u kain y adika pen ang gul tauka penekul bekerejasama.
China enggau Sarawak ku iya, bakih kerejasama asal dalam mayuh bengkah bidang baka ngaga infratruktur, ngaga kereban, kuasa beresi, bumai bekebun tropika, ekonomi gadung sereta dagang temuai.
“Bisi peluang besai endur kededua menua nempa kerejasama dalam dagang temuai. Ba taun 2018, temuai ari China manggai urung 150 milion iku.
“Bekaul enggau ekonomi digital, China benung jampat mansang. Teknologi pemadah baka e-dagang, ‘big data’, ‘cloud computing’ udah enggau ba pengawa ngaga ‘Belt and Road’ beberapa taun ke udah.
“China gagit bekerejasama enggau Sarawak numbuhka digital silk road,” ku iya.
Cheng mansutka pekara nya dalam Batang Jaku iya ba pengerami bejadika Woksyop Ekonomi enggau Licha Polisi Kerejasama Entara China enggau Sarawak ti diatur ba sebuah hotel ditu, kemari.
Woksyop enggau licha nya dipenyadika Sapit Kepala Menteri ti mega Menteri Pemansang Industri enggau Orang Dagang, Datuk Amar Awang Tengah Ali Hasan ke sama digulu menteri Muda E-dagang Datuk Mohd Naroden Majais.
Berebak enggau tu, Cheng ngarapka Sarawak enggau China ulih terus ngenegapka kaul sereta bekerejasama ngaga pemaru enggau pengelantang.
“Aku ngarapka mensia mayuh ari genap raban bansa ulih maju dalam ba pengagit bekunsi, nyadi pengansak kerejasama ekonomi enggau pengawa dagang entara China enggau Malaysia, nyadi peransang besai inisiatif ‘Belt and Road’.
“Aram mih kitai bebendar ngenegapka kerejasama pragmatik ba semua bidang enggau sama nyapai pemansang baka ke suah dikereja kitai,” ku iya.