Pengerami ke-74 taun dikena ngingat ‘Unsung Hero’ di Bario udah diatur enggau adat basa

MIRI: Taun tu pengerami ke-74 taun dikena ngingatka penyangkai lapan iku soldadu payung terejun ari baruh Raban Besekutu Unit Khas Z ke diberi nama ‘Semut 1’, ti betuaika Tom Harrison kena 25 Mac, 1945 di Bario, ke udah diatur nyadi sejarah enggau ti pemadu ngenyinuka ati kelebih agi enda disereta Komando Jack Tredrea.

Semina iya siku ari kaban Unit Khas Z ti agi meruan lalu udah ngulu empat pengerami dikena ngingat ke formal ti diatur ba Bario lalu taun kepenudi endar iya datai ditu iya nya ba taun 2017.

“Kelebih agi dikena masa Niang Jack Tredrea ‘siku WWII orang berani ba Bario’.

Kitai balat berasai enggau penadai siku orang berani enggau pengelenyau kaban kitai Jack Tredea ti udah nadai taun nyin kemari 17 Julai 2018. Ba umur Iya 98 taun,” ku Dr. Philip Raja, Presiden Menua Pesisir Kelabit Sarawak, RKS maya pengerami.

Iya madah pengerami dikena ngingat nya dikena meri basa ngagai semua ‘Unsung Hero’ nyengkaum Kelabit ti udah sama bela begulai enggau orang Australi enggau raban besekutu belaban ngemansutka Sarawak ari pegai perintah Jepun.

Iya ngenataika terima kasih ngagai semua ketegal udah ngatur pengerami dikena ngingatka ti udah mujur dipenyadika Kaban Kunsil Nengeri Mulu ke mega Sapit Speaker DUN, Datuk Gerawat Gala ti digulu 100 iku temuai ari raban soldadu, opis perintah, enggau tuai komuniti.

Entara temuai ti dipebasa ke bisi datai iya nya Brigadier General Datuk Johnny Lim Eng Seng, komando 31 Infantri Brigade, Sibu, Lt. Jen (R) Datuk Stephen Mundaw @ Balang Dita ti ngarika Komando Perintah Medan Timur Malaysia Soldadu Menua Malaysia (ATM), Lt. Jen Datuk Wira Zamrose Mohd Zain, Sekretari Politik Kepala Menteri Sarawak, Robert Ayu, Direktor Pengelantang Pendiau Soldadu Veteran, Sarawak, Lt. Col Dungging Serit, anak lelaki lumur dua niang Sgt C F Sanderson DCM (‘Z’ Special Unit) ari Newcastle (Australia), David Sanderson, Pemesai Pengurus Sarawak, Bario, Edwin Jelenggai, ketuai opis perintah enggau ketuai komuniti nyengkaum Penghulu Robertson RKS kaban Exco menua, Dr Roland Mattu, John Terawe enggau chairman RKS pampang Bario, Martin Belawing.

Ku Gerawat, bisi kebuah perang nyadi ti balat mai penyai tang nya dipelaba manah bansa Kelabit ti meri pemujur ke besai ngagai bansa Kelabit sepengudah beperang.

Iya madah siti utai ke udah nyadi iya nya pemanah enggau pengelantang diau idup bebaik enggau entara komuniti nyadi sepengudah perang tu.

“Ingat jampat kemua, udah perang dunya kedua, siku kaban Z Force, Major Tom Harrison mutuska pulai ngagai Bario lalu enda disangka nyadi penyerakup ngemansangka bansa Kelabit.

Iya lalu mai chara belajar moden lalu mai bala komuniti ngaga sekula primari ti keterubah ba Pa Main ba taun 1946. Pelajar meri peluang enggau mega nyadi jalai ngagai pemansang lalu mai asil ti mujur ba ikas bansa enggau entarabansa,” ku iya.

Entara ke mujur enggau nyadi teladan iya nya Henry Jala, David Lian, Berauk Batu Bala, Ngerawe Ulun, Derisa Orang Ulu (Ngimat Ayu, Beraok), lutur beranak (sinah Bala Lutu), betanam betupi (Raja Ngetan).

Udah nya, nengah sekula primari enggau sekundari Bario, pemujur pelajar bisi ngadaka lebih 500 graduet ba mayuh bengkah ari anggar 6,000 iku peranak bansa Kelabit diatu.

Gerawat mega deka ngaga dokumentasyen senentang pengawa perang dunya ke dua enggau Konfrantesyen enggau mega pemujur Bario ngagai pengingat enggau indrustri dagang temuai.

Iya nyuruh RKS enggau Serakup Soldadu Veteran Sarawak begulai sama dalam ngaga dokumentasyen semua utai ke nyadi nyengkaum nanda lalu ngibun ba dalam bup ti deka dikeluarka. Iya meri jamin enggau sukung sereta tulung deka diberi sida ari Dayak Cultural Foundation.

“Dikena ngingatka Z Force ke-75 taun 2020, pengerami besai diprerambu deka dipenyadi lalu nyadi pengerami dagang temuai ke besai (Niki ngagai Batu Lawih enggau bejalai sepemanjai bukit Punga Pawan).

Tu deka narit ati nyadi ke dagang temuai ba Bario sereta ngarapka nyadi siti aktiviti dagang temuai ba kalender Dagang Temuai Menua ba maya ti deka datai,” ku iya.

Gerawat meda deka Palan Pengingat Bario dikemanahka agi ngambika maya pengerami ke-75 taun deka datai RKS meri input ngagai Kunsil Bandaraya Miri awak ke ngaga manah agi palan nya. Iya besemaya deka meri RM80,000 dikena bejalaika projek nya lalu nambah geran MRP sepenyampau RM10,000 ti udah diberi iya sebedau tu dikena ngemanahka palan pengingat nya.

Lt. Jen (R) Stephen Mundaw mega bejaku pengerami ti kemeratka ba taun ti deka datai iya nya nyengkaum payung terejun enggau aktiviti dagang temuai ti bekait lalu mega ngemanahka pemansang palan pengingat.

“Ditu nadai pengelantang ti nadai penyanggup ati enggau nadai pemansang ti nadai pengelantang. Kitai patut beterima kasih nagai pengelantang enggau penyanggup ati orang berani unsung.

Dikena kitai ngingat sejarah lama Bario. Mayuh perang nyadi ba Bario. Mayuh palan titemu enggau betulis enggau kekeda palan ke ngembuah sejarah ba Bario ditanda dikena rebak ti deka datai ngambika sida nemu baka kem, palan ala betimbak, palan amunisyen ba pelajar sejarah,” ku iya.

KENANG KITAI: Temuai ti dipebasa VVIP (baris ti kedua, dua ari kiba) Robert, Stephen, Dr. Philip, Gerawat Lim, Sanderson enggau komuniti Bario sereta bala Soldadu begambar udah tembu pengerami nya

KENANG KITAI: (Duduk ba baris ti kedua, dua ari kiba) Robert, Stephen, Dr. Philip, Gerawat, Lim, Sanderson, Dr. Roland, tuai komuniti bukai enggau komiti pengatur.

TERIMA KASIH: Gerawat (tiga ari kiba) nerima tepa pengingat ari Lim ba mua sida ke bukai.

KELAI PENGERAMI: Raban Soldadu ngantung menira seraya lalu lagu ‘Amazing Grace’ dinanyika maya pengerami nya.

JAKU PUJI: Gerawat (kiba) bejaku ba pengerami nya.

KE ALBUM: Begambar sepengudah pengawa pengerami ngengkahka bungai (ari kiba) Dr. Philip, Stephen, Gerawat, Lim enggau Sanderson.

DIKENANG BELAMA: Stephen ngengkah bungai ba batu pengingat ‘Unsung Hero’‘Semut 1’.

LAGU BASA: Bala mensia mayuh begulai buglers enggau Bag piper ari soldadu t nebah lagu ‘Amazing Grace’ lebuh ngelancharka pengerami nya.

SELAMAT DATAI: Bala VVIP disambut lebuh ke datai ba palan nya.

BASA: Gerawat ngenulu pengawa ngengkahka bungai maya pengerami dikena ngingat taun ke74 penyangkai lapan iku soldadu payung terejun ari baruh Raban Besekutu Unit Khas Z di Bario.