Festival KrafJari Malaysia pelasar ke pemadu manah endur ngelaku pesaka asal bansa Malaysia
MIRI: Festival Asil Pengelandik Jari Malaysia udah diatur ba Miri bedau lama udah, iya nya siti palan ti pemadu manah dikena nyungkak penatai pemisi orang ti ngeluarka enggau orang ti mekalka asil, nyungkak ekonomi di menua sereta mega ngelakuka pesaka asal ti dikembuan raban bansa di Malaysia ngagai komuniti global.
Festival nya udah narit penatai mayuh temuai nyengkaum ke ari Brunei enggau Sabah, ke alai bisi 50 bansal disediaka endur nyual mayuh bengkah asil pengelandik jari digaga ari kayu, wi, seramik, besi, tekstil sereta enggau mutiara.
Sida ti bejualka asil pengelandik jari diri kelebih agi ari menua Sarawak kelimpah nya mega bisi enggau ngambi bagi ari menua Sabah, Melaka, Perak, Selangor enggau Kuala Lumpur.
Nitihka padah Penulung Pemesai Ngatur Ekonomi Opis Pemansang Pengelandik Jari (Sarawak), Mohd Hafiz Mohd Hashim madah semua sida ke bejual bisi madahka utai dijual sida jampat dibeli tajapan asil jual bisi kurang mimit ari taun ke udah.
“Ambi ke banding, ba tiga hari ti keterubah, sekeda sida bisi madahka asil penguntung ari utai ke dijual sida sepenyampau RM2,000 ngagai RM6,000 lalu bisi mega ngerikod asil ti lebih tinggi,” ku Hafiz.
Sekeda orang dagang enggau orang ke meli lebuh ditanya muji opis pengatur laban ngatur pengerami nya ninting taun tang ukai semina di Miri aja tang mega ba nengeri ke bukai di Malaysia.
“Taun tu bisi laun mimit banding enggau taun ti udah tang tetap agi nerima timbal ti manah ngagai asil pengelandik ke digaga aku ari kayu enggau rutan,” ku Mohd Amin Abdullah ari pelilih menua Serian lalu orang ti udah enggau ngambi bagi ba pengerami nya pengelama lebih 15 taun.
“Timbal ti manah lalu luar ari jangka ngagai asil pengelandik jari ke digaga khas ari Selangor,” ku Rosmah Mustafah ari Melaka.
Sida ti baru enggau ngambi bagi ba pengerami tu ari Long Banga, Ling Jalong madah “tu awak ti pemadu iya manah dikena kitai betemu enggau orang ke meli. Sehari tu aku nerima berapa iti peminta ti nyauka manggai RM1,000 ke ngepan asal enggau ketapu Kenyah,” ku iya.
Justina Laeng ari Persatuan Pelukis, Seni Visual Miri (PPVSM) mega setuju enggau Ling “tajapan ekonomi lubah, Festival Asil Pengelandik Jari ulih nyungkak ke agi asil jual dibanding enggau ke semina dijual ba kedai aja,” ku iya.
Siku pemeli ke rindu ngumpul barang lama Jaludin Amat, pengajar Norafzannizah Mortada enggau Rosini Mohamad mega muji pengatur festival asil pengelandik jar lalu ketegal orang dagang t meri komitmen ti tinggi nyendia asil pengelandik jari t tinggi kualiti enggau peminta ti tinggi mega.
Berebak enggau nya, Hafiz madah festival nya siti ar strategi dikena ngelakuka sereta nyual asil pengelandik rayat Malaysia lalu kelimpah meransang raban nembiak meli asil pengelandik jari sereta rinduka pengawa nbgelaku baka aktiviti main asal.
Kelimpah ari nyual enggau ngelakuka asil pengelandik mayuh macham aktiviti mega bisi diatu sekumbang festiva nya. Sekeda sida ngaga kus ke diatur Intitusyen Kraf Nasional begulai enggau sida ti bekuasa, mantaika chara ngaga pengelandik jari, woksyop enggau belajar ngaga asil pengelandik jari kelimpah diperindang enggau musik (nyadi kena hari enam enggau hari minggu).
Festival ke sama deka diatur ba Miri ba tengah taun tu ila.