KRT ditumbuh nyadi mata enggau pending opis bekuasa
Nya mega kelai perintah beratka pengelikun komuniti kelimpah nyapai juluk ati nempa penyerakup bansa, nyaga pengelikun
Sida tu nyadi mata enggau pending ngagai opis bekuasa dikena nyaup meri penerang baka penyalah rama enggau penyalah gian dadah ba genturung pendiau diri.
Siti Nurfatimah Hussen
Pemesai Opis Penyerakup Menua enggau Intergrasi Nasional (JPNIN) Sibu
SIBU: Penumbuh Kawasan Rukun Tetangga (KRT) kelai mandangka perintah ngemeratka pengelikun komuniti ari napi penusah dikeruga orang bukai.
Pemesai Opis Penyerakup Menua enggau Intergrasi Nasional (JPNIN) Sibu Siti Nurfatimah Hussen madah,penerang ke diripot ngagai raban penerit adat ukai semina mutarka penusah tekala nya tang mega nyaup perintah nyapai juluk ati nempa penyerakup bansa enggau nyaga pengelikun.
“Sida tu nyadi mata enggau pending ngagai opis bekuasa dikena nyaup meri penerang baka penyalah rama enggau penyalah gian dadah ba genturung pendiau diri,” pia ku iya madah.
Iya mantaika jaku tu maya Program Geran Komuniti Sitak Sibu KRT Swan Rejang ba Dewan Su Kuok Garden, Grand Height, hari Minggu nyin tadi.
Siti Nurfatimah madah, kelimpah ari nya program nya mega nambahka penemu ngagai mensia mayuh sentang pengawa ngintu pemeresi kandang pendiau.
“Pesereta ke datai baka nembiak sekula patut diembing kitai ari umur ke biak ngambika sida ngemeratka pemeresi kandang pendiau diri empu,” ku iya madah baru.
Aktiviti ti bisi dipejalaika maya program tu baka licha nyeliah denggi, licha bekaul enggau dadah, program pemandang ari Opis Pengerai Sibu, Opis Narkotik enggau Ejensi Pemunas Dadah Menua (AADK) Sibu.
Pengawa beripai begulai enggau KRT Swan Rejang Sibu, Opis Kaunsil Sibu, SK SEDC Sibu, SJK Thai Kwang Sibu, SMK Lanang enggau Gerempung Peranak Taman Grand Height bela bisi diatur maya nya.
Program tu dipenyadi Chairman SMC ti mega Kaban Kunsil Nengeri Dudong Datuk Tiong Thai King sereta digulu Ketuai Opis Polis Lanang Devaraj Subramaniam enggau Chairman KRT Swan Rejang Kapitan Yeo Soun Kou.