Indu dara ditesau nyereta Pekit Kumang Gawai Dayak renggat Sibu

SIBU: Indu dara ke beumur 18-30 taun ditesau ngambi bagi ba Pekit Kumang Gawai Dayak renggat Sitak Sibu ke diatur kena 19 Mei tu ba Hotel Kingwood ditu.

Pekit tu diatur beserimbai enggau Pengerami Makai Lemai Mantar Gawai Dayak renggat Sitak Sibu ti dipelabaka deka digulu Sapit Kepala Menteri Datuk Amar Douglas Uggah Embas ke nyadi tuai pengabang maya nya.

“Bayar enggau bepekit semina RM10 aja tang semua ungkus dikena bepekit nya bepanggai ba diri empu magang.

“Kelimpah ari nya, pemekit mesti ngembuan peninggi enda kurang ari 5 kaki 2 inchi,” pia ku Chairperson Komiti Pekit Senorita Salleh, empai lama.

Iya madah, poin deka dikira ari pemajik (50 peratus), ngepan (30 peratus) enggau tubuh tubuh sereta pemerani (20 peratus).

Pemekit mesti nganjung nama sida enda ngelui ari 3 Mei tu pukul 5 lemai, ku iya nambah.

Gelar Kumang Gawai Dayak Sibu deka mai pulai perais mata duit RM2,000 sereta disempulang trofi hamper, selampai enggau jumpang.

Gelar Lulung enggau Selinggar Matahari bela mai pula perais mata duit RM1,500 enggau RM1,000 sereta trofi hamper enggau selampai.

Penuduk lumur empat enggau lima mai pulai perais RM250 sereta penuduk lumur endam nyentuk ke-10 ma pulai perais sagu ati RM150 siku.

Pom enggau penerang silik tau ditanya ba Senorita nengah lumur 013-8061265, Claudia Dieo (019-8346803), Priscillia Demi (011-19353592) Velda Imas (013-5782816) tauka Adellyn Bagol (0182073911).

Pengerami serak tu diatur Serakup Indu Dayak Sarawak (SIDS) Sibu bekerejasama enggau Gerempung Dayak Sarawak (SDNU) Sibu, SDNU Rejang, SDNU Sibu Jaya enggau Gerempung Orang Ulu (OUNA) Sibu.

Chairperson SIDS Sibu Angelyn Uchi Maseng nyad Tuai Gawai tauka chairperson komiti pengerami ungkup taun tu.