FAMA nagit bulih asil RM1 juta sekumbang SFF 2019
KUCHING: Opis Dagang Betanam Betupi Perintah Besai(FAMA) Nengeri Sarawak nagit bulih asil ari bejual sepenyampau RM1 juta sekumbang timpuh ngatur Sarawak FAMA Festival tauka Sarawak FAMA Fest (SFF) 2019 berengkah ari 26 nyentuk 28 April tu.
Direktor Dagang Betanam Betupi Perintah Besai (FAMA) Nengeri Sarawak En. Shahid Abu Bakar madah, bisi 1,100 iku orang dagang deka ngambi bagi ba festival ti keterubah endar diatur berengkah ari 26 nyentuk 28 April, ari pukul 8 pagi nyentuk 10 malam ba Medan Niaga Satok.
“Bisi 1,100 orang dagang betanam betupi nyengkaum, mayuh bengkah industri bekebun enggau bumai, orang dagang Medan Niaga Satok, orang dagang ladang kontrak, orang dagang ‘Food Truck’enggau mayuh agi deka sama ngerichahka festival nya.
“FAMA ngarapka mayuh agi orang dagang betanam betupi enggau ba program tu ngelakuka preoduk sida ngagai mensia mayuh,” ku iya seraya madah festival ke sama udah diatur di Pulau Pinang enggau Melaka sebedau tu.
Ku Shahid baru, festival nya deka dipenyadi Ketuai Direktor FAMA Dato’ Ahmad Ishak enggau tuju ngelakuka tanggungpengawa sereta aktiviti FAMA ngagai mensia mayuh ba pengawa nyual asil betanam betupi tu.
Iya madah munyi nya ba aum pengarang berita beserimbai enggau pra bejadi Sarawak FAMA Fest 2019 ti adiatur ba bilik aum opis FAMA Nengeri Sarawak ditu, kemari.
Sama datai, Penulung Direktor Pemansang Orang Dagang FAMA Nengeri Sarawak, Adeyong Tomick enggau Ketuai Unit IAT sereta Promosyen FAMA Nenger Sarawak, Joblee Nahri.
Ku iya, mayuh bengkah aktiviti mega bisi disempulang raban pengatur nyengkaum bemukun enggau program meri gred, mungkus enggau ngelabel (GPL), mandangka jelu tupi sereta nyual barang ti dikemata perintah baka gula enggau minyak sumai.
“Bela bisi diatur maya bejad nya ila iya meri gelar ngaga tiga iku orang dagang ke nyulut,” ku iya seraya melabaka 50,000 nyentuk 70,000 iku mensia mayuh datai ngaga festival ke diatur pengelama tiga hari nya.
Kelimpah nge lakuka pemakai asal menua tu ku iya tuju festival nya diatur mega dikena numbuhka rentayan makit ke pemaik raban ke ditagit baka orang dagang orang betanam betupi, pemurung, pengeksport enggau perunchit.