FAMA deka bebendar matau pengimport, pengeksport ngambika nitih atur GPL
KUCHING: Opis Dagang Betanam Betupi Perintah Besai (FAMA) deka bebendar matau pengimport enggau pengeksport bekaul enggau pengawa nitihka atur meri gred, mungkus enggau ngelabel (GPL) ba tetiap iti produk betanam betupi ba supermarket.
FAMA ti dikearap nitihka Akta 141 dikena netapka standard ungkup Kualiti fizika sesebengah produk betanam betupi nguna Malaysia Standard ( MS) nitihka Akta Standard Malaysia 1996 (Akta 549).
Direktor FAMA Syahid Abu Bakar, madahka atur nya digaga bepelasarka Seksyen 3(2)(C) Akta 141 ngambika penerang ngagai mensia mayuh nemu kuasa FAMA bejalaika pengawa atur GPL.
“Bala pengimport enggau pengeksport ba supermarket anang enda meretika kebuah produk betanam betupi ditapis nengah proses GPL sebedau dijual ngagai mensia mayuh.
“Suku keterubah taun tu, FAMA nengeri Sarawak udah meri penerang ngagai orang ke bekaul lalu diatu sepenyampau 80 peratus sida ke nyual produk betanam betupi udah nitihkal enggau GPL,” ku iya.
Iya madahka pekara nya ba aum pengarang berita pra bejadi Sarawak FAMA Fest 2019 ti diatur ba bilik aum opis FAMA Nengeri Sarawak ditu, kemari.
Shahid nambah, tuju pengawa matau tu dipejalaika dikena nentuka produk betanam betupi ke dibai tama ngagai menua kitai bekualiti sereta beresi ari rachunindu utai.
Ku iya, Perintah Nengeri Sarawak mega bebendar deka ngelakuka GPL ungkup produk menua tu ke dijual di menua luar.
Iya mega madah, sida merambu deka ngatur program Nyual Terus Ari Kebun ba Miri kena 13 nyentuk 25 Ogos ti deka datai.
“Tu ngambika mensia mayuh enggau penguna meli produk betanam betupi ti dikeluar enggau rega ke patut,” ku iya.
Kelimpah ari nya, FAMA mega deka ngatur kus Nambah Pengelandik enggau Ngelakuka Buah Rian ba Dewan Tayung Langui, Kampung Pichin, Serian kena 2 Mei tu.
“Naka ke diatu, kitai udah nerima penyereta 200 iku ari orang dagang lalu kus tu deka mandangka chara deka ngawin pun buah asal enggau paung baru,” ku iya nambah, sida mega bisi nyual paung rian maya kus nya dipejalaika.
Sama bisi datai, Penulung Direktor Pemansang Orang Dagang FAMA Nengeri Sarawak, Adeyong Tomick enggau Ketuai Unit IAT sereta Promosyen FAMA Nengeri Sarawak, Joblee Nahri.