KKTP komited ngatur polisi, strategi ngintu rampa menua
Opis menteri tu deka seruran nentuka pemansang ti meruan ba rampa menua lalu begunaka saup semua ejensi, komuniti
KUCHING: Opis Menteri Kaunsil Kandang Menua enggau Pengawa Berumah (KKTP) komited ngatur polisi enggau strategi dikena ngatur pemansang ti efektif enggau meruan dikena betapi enggau isu rampa menua.
Sekretari Politik ngagai Kepala Menteri, Tan Kai madahka, deka nentuka pemansang ti meruan ba rampa menua tauka kandang endur endang begunaka saup semua ejensi sereta raban bansa.
“Strategi enggau polisi tu udah bisi sereta dipejalaika enggau chakah sereta diteritka ba mayuh renggat ejensi perintah lebih agi raban bekuasa kaunsil kandang menua (PBT).
“Ambika chunto, konsep 3R (reduce, reuse enggau recycle) siti chara dikena betapi enggau pengamah uras (waste pollution) sereta dikena nyaga rampa menua asal kitai ti chukup berega.
“Opis Kaunsil kandang
menua chukup chakah tauka regas ngelakuka chara tu ngagai raban bansa iya nya pemeresi isu tauka pekara ke nadai tatak sereta patut konsisten dikena nagang penyakit enggau ngetanka tikas pengerai mensia mayuh,” ku iya.
Tan Kai mansutka pekara nya lebuh bejaku ba School Greenovation Programme 2019 nyerumba ngintu genap 20 taun Trienekens (Sarawak) Sdn Bhd ti diatur ba sebuah hotel ditu, kemari.
Tan Kai datai ngagai pengerami nya ngarika Menteri Kaunsil Kandang Menua enggau Pengawa Berumah, Datuk Prof Dr Sim Kui Hian.
Bejaku baru Tan Kai madahka, taja pia kitai enda patut semina bepanggai ba opis kaunsil kandang menua mutarka isu nyaga pengerai enggau pemeresi baka muai uras ba sebarang endur laban tu begunaka saup ari semua raban bansa.
Iya madahka opis menteri nyambut manah inisiatif ke ulih mai ngagai pemansang ti meruan nyengkaum inisiatif ari kompeni sereta program sekula ti ngena inovasyen enggau kreativiti dikena nuju ngagai pemansang ke meruan.
“Kitai chukup meransang raban biak ngemansangka konsep enggau jalai ngatur tauka chara mutarka penanggul ti talukka pemanah rampa menua.
“Lalu aku chukup arap bendar tu deka ngepunka sdia nyadi orang inovator tauka sainstis ti muka jalai ngagai Sarawak nyadi beresi enggau gadung jemah ila,” ku iya,
Lebuh ke ngenang program ke diatur Trinekens (Sarawak) Sdn. Bhd nya, Tan Kai muji bala nembiak enggau pengajar ti ngambi bagi ba pekit ke dibagi ngagai tiga kategori iya nya Greenscape Upcycling, The Young Greenovators Upcycling enggau pekit Green Runway.
Iya madahka penyereta ari raban biak amat beguna dikena ngelaku tauka madahka pasal tikas pemanah rampa menua ba bala nembiak.
“Program tu senipak enggau pemendar tauka pengeran Opis Menteri Kaunsil Kandang Menua enggau Pengawa Berumah ti deka ngangkatka pengelantang raban bansa enggau rampa menua nengah meri penyedar ti lebih tinggi enggau pelajar pasal chara ngurus rampa menua,” ku iya.
Sama bisi datai ba pengerami nya kemari, Group Cheif Executive Officer Trieneken(Sarawak) Sdn Bhd Stephen Chin; Ketuai Unit Pengurusan Pembangunan Kemanusiaan, Opis Pelajar pelilih Menua Kuching Yazit Belon; pengari Direktor Opis Pelajara Nengeri Norman Suhali, Executive Director PE Land Sdn Bhd Joana Lin sereta bala apai indai, pengajar enggau nembiak.
Strategi enggau polisi tu udah bisi sereta dipejalaika enggau chakah sereta diteritka ba mayuh renggat ejensi perintah lebih agi raban bekuasa kaunsil kandang menua (PBT).
Tan Kai
Sekretari Politik Kepala Menteri