Trienekens begunaka saup komuniti dalam ngintu rampa menua
KUCHING: Ketuai Pemesai Eksekutif (CEO) Trienekens Group Stehpen Chin madahka Trienekens begunaka saup raban bansa ba bejalaika tanggungpengawa nentuka proses ngatur utai ke nadai guna (waste) dipejalaika enggau likun sereta enda ngerusak rampa menua.
Berindik ari pekara nya ku iya dikena meri pemereti ati ngagai raban bansa lebih agi raban biak baka nembiak sekula, Trienkens ngatur program bekaul enggau rampa menua tauka endur pendiau ungkup nembiak sekula Primari enggau Sekondari ti dikumbai ‘Greenovation School Programme’.
“AriperspektifTrienekens, kami bisi tanggungpengawa nentuka proses ngurus sisa(waste) dipejalaika ngena chara ti likun enggau enda ngerusak rampa menua.
“Lalu tanggunpengawa tu, pekara ti ukai ulih dipejalaika kami aja tang mesti dikereja begulai enggau raban bansa ti ngelinggi kami.
“Nya alai nengah ‘Greenovation School Programme’, kami ngarapka tu nyendiaka pelasar ngagai raban biak ngambika ngemansangka konsep inovatif ti ulih mantu ngurangka pengawa enda ngemeratka rampa menua nengah konsep recycling, ngambi sereta berundingka baru chara ngena bahan sisa kelimpah ari nempa kerejasama enggau orang bekebun sereta minta ngambika ngena barang ke ulih dikena belama,” ku iya.
Chin mansutka pekara nya dalam jaku pengelalu ba pengerami ‘Greenovation School Programme 2019’ ke diatur piak iya ba sebuah hotel ditu, ti digulu Sekretari Politik ngagai Kepala Menteri Tan Kai, kemari.
Nyerumba pengerami ngintu genap 20 taun, Trienekens (Sarawak) Sdn. Bhd ngatur program rampa menua renggat sekula iya nya ungkup sekula sekondari enggau Primari di mengeri Kuching.
Ari baruh program tu, sekula ke ngambi bagi bepekit nitihka tiga tema kemampanan ke udah ditetapka iya nya pekit ‘Greenscape Upcycling, the Young Greenovators Upcycling enggau pekit Green Runway’.
Batang tuju program iya nya dikena nyendiaka pelasar ngagai nembiak sekula ngemansangka inovatif enggau runding kreatif bepelasarka konsep 3R (Reduce, Reuse and Recycle) kelimpah ari nempa penyedar pasal kemampanan/sustainability) rampa menua.
Bisi 44 raban pemekit ari 25 buah sekula ngambi bagi dalam pekit ti dibagu ngagai dua kategori iya nya kategori sekula Primari enggau sekula Sekondari.
Nembiak enggau pengajar dipinta kreatif ngemeran tauka ngena baru barang ke enda diguna ngasilka landskap kandang sekula enggau ngasilka kostum sereta produk.
Pekit Greenscape Upcycling lumur satu iya nya SJK Chung Hua Pangkalan Baru (Primari) enggau SMK Datuk Patinggi Abdul Gapor (Sekondari) ti sama bela mai perais mata duit RM1,500, tropi enggau setipikit.
Lalu pekit the Young Greenovators Upcycling lumur satu iya nya SJK Chung Hua No.5 (Primari) enggau SMK Bandar Kuching No. 1 (Sekondari) ti sama mai pulai perais matu duit RM1,000, tropi enggau setipikit.
Nambahka nya pekit Green Runway iya nya lumur satu SK Jalan Ong Tiang Swee (Primari) enggau SMK Tun Abdul Razak (Sekondari) ti sama bela mai pulai perais mata duit RM1,000, tropi enggau setipikit.