Tendurka agi atur VOA dikena matak mayuh agi temuai ngagai Sarawak
MIRI: Menteri Dagang Temuai, Seni enggau Main Asal deka ke Opis Imigresyen enggau ejensi dagang temuai bekerejasama ngambi nendurka agi atur Visa Penatai (VOA) di Pos Kawalan enggau Kuarantin (CIQ) Sungai Tujoh.
Sapit menteri opis nya, Datuk Lee Kim Shin madah, tu beguna bendar ke alai taun tu iya nya Taun Nemuai ke Sarawak 2019.
“Kitai dekaka semua temuai ti datai nengah Brunei di CIQ Sg Tujoh ulih tama ke Miri enggau lanchar enggau nadai sebarang penanggul sereta pemar.”
“Kelimpah ari nya, kitai deka atur pengawa tu dikemudahka agi di kena nyapai tuju 30 juta orang nemuai ungkup Taun Nemuai ke Malaysia 2020,” ku iya lebuh ngulu penerang sentang VOA ke dikenatai Opis Imigresyen CIQ Sg Tujoh kemari.
Pemun VOA baru tu iya nya ungkup orang nemuai datai ari menua China enggau India ti tama ngagai menua tu nengah Sungai Tujoh Miri - Brunei.
Bisi 22 peminta orang nemuai ari China udah diterima kenyau nya dipejalaika bulan Julai tu tadi.
Ku iya, ejensi dagang temuai patut nentuka temuai sida diintu enggau manah lalu enda ditating enggau pekara ti mit baka ngisi pom, ngaga salin tikit, dokumen sereta madahka duit belanja sida.
“Dalam pekara tu, aku merambu ngambika ejensi dagang temuai mantu nyendiaka dokumen lalu madah nama ke diguna sebedau datai ba pintu penama imigresyen,” ku Lee.
“Sida mega patut madah ngagai penguasa imigresyen enggau tumu agi enti mai mayuh temuai ngambika penyampau pengereja pengawa ba kaunter ulih ditambah dikena ngelengkaska agi peminta sida,” ku iya.
Sama bisi datai ngulu program nya Residen Miri Mastapha Julaihi, Sapi Penulung Deriktor Imigresyen Sungai Tujoh, Mohamad Naziff Othman, Sapit Penulung Penguasa Sungai Tujoh, Wong Yieng Ching enggau Penguasa Sungai Tujoh Doehaile Bujid enggau bala pengari ejensi dagang temuai Miri enggau Brunei.