Matematik subjek ti nyungkak pemansang sains, teknologi
SIBU: Matematik nya subjek antarabansa ti ngemansangka sains enggau teknologi.
Sapit Pemesai Opis Pelajar Pelilih Menua Sibu Sim Peck Huat madah, enti nadai matematik, sains enggau teknologi pedis deka dipejalaika.
“Matematik nya ukai semina siti subjek tang nya subjek ke diajar di serata dunya ke patut temu kitai.
“Dunya diatu amat begunaka ubah ke baru ba sains enggau teknologi tang iya begunaka matematik dikena ngerembaika nya,” ku iya bejaku bejadika ‘Pengerami Nutup Woksyop Teknik Peresa Matematik SPM’ ditu, kemari.
Bisi mega diatur beserimbai woksyop iya nya Kuiz Matematik Entara Sekula.
Woksyop tu diatur Methodist Pilley Institute (MPI) enggau Persatuan Akauntan Bertauliah (ACCA) Malaysia.
Sepenyampau 430 iku nembiak sekula ari 20 buah Sekula Sekondari(SMK) ari kandang menua Sibu nyengkaum Bintangor ngambi bagi ba woksyop sepengelama sehari nya.
Bela sama bisi datai nya Menijar Kanan Pemansang Dagang ACCA Malaysia Ivan Tan, Ketuai Pemesai Eksekutif MPI Hii King Kai enggau pengelicha woksyop Tan Beng Puai.
Sim madah subjek nya diguna semua orang tetiap hari ba dalam pengidup sida.
“Subjek tu bekaul enggau ekonomi, ubat, sains, pekara wang, teknologi, rampa menua nyengkaum ba sekeda polisi.
“Kelimpah ari nya, bisi mega bekait enggau pengidup nyengkaum pemati.
“Nya alai, matematik bisi ba dini-dini endur enda ngira sesapa lalu iya diberi basa ari dunya nengah nguna subjek nya enggau besai,” ku iya enggau nyemetak madah.
Berebak enggau nya, Sim temegah ati enggau inisiatif ke diambi MPI sereta ACCA ke ngatur woksyop tu lalu ulih nulung bala nembiak sekula ngangkatmanah agi pengelandik ba subjek tu.
Ku iya, woksyop tu mega meri empas ngagai subjek ‘Prinsip Akaun’ ke bisi ngena matematik nengah penerang maya woksyop nya.
Iya pechaya kerejasama entara MPI, ACCA enggau Opis Pelajar Pelilih Menua (PPD) Sibu deka datai ngerembaika agi woksyop tu nyengkaum Sains sereta Inggeris.
“PPD Sibu deka bekerejasama enggau MPI sereta ACCA ba woksyop ti deka datai ila lalu iya endang ba dalam pengawa kitai ngangkatka agi pemutus sereta penyulut dalam subjek Matematik, Sains enggau Inggeris nengah peresa perintah,” ku iya nambah agi.
Ba kepenudi program nya, Sim enggau Hii besilih setipiket ke nyadi kelai kolabrasi kerejasama dalam woksyop ti deka datai lalu dikemataka Ivan ke tanda sukung ari ACCA ba penyulut subjek nya.
Sim mega bisi nyua perais ngagai bala ke menang kuiz nya.