Program ‘Santai-Santai Seni’ udah ngerichahka Sepital Miri

MIRI: ‘Santai-Santai Seni’ siti program terapi tubuh enggau runding ti ulih nukar asai ti sinu ba Sepital Miri kemari ngagai asai ti rindang sereta gaga.

Keterubah nya diatur Sepital Miri begulai enggau Artis Miri sereta Gerempung Artis Visual tauka PPSVM, ti di gempung enggau seni, muzik enggau mayuh bengkah program pelajar enggau pengawa beperesa pengerai ti diatur ba lobi sepital.

Kaban Kunsil Nengeri (ADUN) Piasau, Datuk Sebastian Ting madah ke alai iya empu berasai gaga ati tajapan keterubah iya meda akticiti program nya ba pintu penama sepital.

“Ba keterubah iya aku nyangka nya siti utai ti bebida tang lebuh aku ke datai, aku meda lalu ngasai asai ati ti enda baka selama lebuh datai ngagai sepital, semua nya ngerinduka, tuchum, musik terapi ti manah, ulih ngelantangka diri empu lalu ba ke bendar iya lebuh aku ke ngambi bagi diri dalam 2 tauka 3 minit main dram ti digaga ari barang ke udah dikena, runding aku numpu ngagai dram 3R lalu nya empu siti ari terapi ke pemadu manah,” ku iya bejaku lebuh ke bejadika program nya.

Iya muji bala komiti pengatur ketegal inisiatif nya lalu ngarapka mayuh agi program ti baka tu lalu nyemetak madah pemanah program Terapi Tubuh enggau Runding nyadika kitai kiruh enggau musik sereta seni lalu seharitu hari ti pemadu lantang.

Dalam dikena nyukung program ti sebaka ba taun ti deka datai, Ting ngemendarka geran perintah sepenyampau RM5,000 ngagai PPSVM dikena bejalaika aktiviti sida.

Dulu ari nya dalam jaku iya, Direktor Sepital Miri, Dr Jack Wong pansik dalam ngangkatka nyuman nengah seni enggau musik ngayanka bisi empas nyuman ti signifikan dalam seni enggau musik, begulai enggau atur nyaga pengerai.

“Lalu pemadu beguna bendar nya selamat, ungkus ti murah, lalu ngayanka gaya nyuman ti likun, dalam sekeda menua, seni nya siti pelasar aktiviti nyadi chara ngibuhka bala orang sakit, orang datai enggau bala pengereja pengawa.

Musik, bahasa Universal,” ba reti ke bukai, udah ditemu bisi empas ngelantangka enggau ngenyinuka lalu ngurangka penakut sereta nganglatka gaya runding orang sakit kelebih agi nembiak mit. Nya mega ngulihka kitai berandau enggau sesama diri,” ku iya.

Nya enggau batang tuju ti bakanya, ku iya madah Sepital Miri nebunaka peluang nya lebuh ke dikelaluka gerempung begulai ngatur program Santai-Santai Seni.

Iya madah, iya udah bisi pengingin ati betetaun ke udah ngaga program ti bakatu tang irauka sapa ti ka begulai ngatur lalu ngujungka Noel Belulok (PSSVM) email ngagai iya dua bulan ke udah lalu sentang program tu lalu iya nadai betangguh madah au.

Kediatu ku iya madah, Sepital Miri udah berengpah bepun dalam bejalaika skala dalam ngengkah sekeda asil seni ba palan ti strategik ba sepital nya.

Noel, ke mega chairman komiti pengatur program nya dalam jaku iya madah program tu dikena ngerapitka kaul dalam timpuh ke panjai entara pengereja pengawa sepital enggau bala kaban gerempung kelimpah ti bekunsi peneleba dalam seni, ngenang sentang proses nyumanka fizikal enggau emosi tauka Seni Nyuman.

Dalam ke meri terima kasih ngagai Sepital Miri ketegal kerejasama lalu Ting meri basa ngagai program nya, iya ngarapka program ti bakanya ulih diatur ninting taun kededua entiti nya lalu ngarap mayuh agi ngambi bagi lalu meri penemu.

Lebih dua puluh buah bansal disediaka dikena nyadi palan nyual sekeda asil seni enggau kraftjari sereta pemakai disediaka kaban PPSVM lalu sembilan buah bansal dikena bala pengereja pengawa sepital bekunsi penerang baka beperesa pengerai enggau nadai bebayar, konsep sepital kemerah enggau embaik mit kelimpah ari ngaga promosi pengerai, beperesa pengerai enggau enda bebayar ungkup kanser tusu, meri darah enggau organ.

Kaban PPSVM ti nyadi pemenang lalu meri tanda basa ngagai Mulu Bats Band – ti nyadi champion dalam 3R (ngurangka, ngena baru, kitar baru) dalam penaluk sida ngaga kereban musik enggau kostum, kelimpah merindang lebuh maya program nya, lalu indu bansa Kiput mantaika tanda asal disempulang enggau musik Sape.

Sama bisi ngambi bagi lalu mantaika pengelandik dalam pengawa betanda ke narit ati mayuh bala orang datai iya nya Ting enggau bala kaban PPSVM.

Sama bisi datai ngagai program nya, Hartini Sinow, komiti pengatur, pengereja pengawa sepital enggau bala kaban PPSVM.

Sekeda ari program ke bisi diatur kelimpah ari ke bejual asil kraftjari enggau pemakai, demontrasyen ngaga seni ngena perengka media enggau enda bebayar, domontrasyen nusuk marik enggau sekeda kraftjari ke bukai kelimpah mandangka musik asal, kek enggau seni karikatur.

MANAH: Pengereja pengawa sepital begulai enggau Ting (tengah) megai asil ke dilukis siku pesakit psikitri ari sepital nya. LANDIK: Peggy Siew ngaga demontrasyen mandang ngagai Ting (dua ari kanan) enggau bala bukai bakani chara nusuk marik ngaga Tangu.

RAMI: Ting (dua ari kanan – baris mua) ngambi bagi ngayanka pengelandik diri enggau bala raban Kiput betanda poco-poco seraya diperindang lagu “Berkikis Bulu Betis” ke dibantai Mulu Bats enggau bala kebukai nyengkaum Dr. Jack (dua ari kiba baris belakang).

NGUJI: Ting enggau Dr. Jack nguji kereban musik 3R begambar begulai enggau bala raban Mulu Bats, PPSVM enggau pengereja pengawa Sepital. Noel (empat ari kanan) enggau Hartini (kanan)

KE KENANG: Dr. Jack, Ting, Noel begambar begulai enggau bala kaban PPSVM udah ke nyua asil chura Noel ngagai Dr. Jack ungkup Sepital Miri.

BEJADI: Ting, Noel, Dell enggau Dr. Jack ngaga kelai nyura dikena nyadika tanda bejadika program Santai-Santai Seni.

RINDANG: Ting (dua ari kiba) teperindang meda siti asil ke bisi dipandang ba pengerami nya