Pengawa nyiri ketuai komuniti agi diatur perintah nengeri
Taja perintah menua udah dipegai PH, tang tanggungpengawa nyiri ketuai komuniti agi ari baruh kuasa perintah nengeri
LONG LAMA: Pengawa nyiri bala ketuai raban bansa di Telang Usan agi mengkang ba baruh bidang kuasa perintah nengeri, ukai ba perintah besai tauka Pakatan Harapan.
Kaban Kunsil Nengeri (ADUN) Telang Usan, Dennis Ngau madah, agi bisi penyarut sekalika sida agi bekuasa lebuh perintah Pakatan Harapan (PH) megai perintah menua.
Iya madah, bisi sekeda orang ngenyarutka ketuai raban bansa enggau tuai rumah, sida nadai kuasa agi berindik ari penumbuh ‘Majlis Pengurusan Komuniti Kampung ‘(MPKK).
“Ba renggat perintah besai, endang PH bekuasa. Tang perintah nengeri kitai, Gabungan Parti Sarawak (GPS) ke bekuasa nyengkaum ngeluarka surat nyiri ketuai raban bansa enggau ketuai bansa.
“Aku nyemetak madah laban agi bisi orang madahka tuai rumah enggau ketuai raban bansa kitai nadai kuasa. Seagi surat nuan bisi chop rasmi burung kenyalang, pengawa nyiri nuan nya endang dituku.
“Enti sema surat nyiri nadai kelai chop rasmi, reti iya tuai rumah tauka ketuai raban bansa nya nadai kuasa. Nyema bisi orang ke betanya pekara nya, bantaika aja surat ke dichiri.
“Anang nangi laban pengawa nyiri kita iya nya nengah proses adat enggau perintah nengeri,” ku Dennis maya bejaku ba pengerami nyuaka setipiket nyiri lanjar ngagai 65 ketuai raban bansa enggau ketuai bansa Pelilih Menua Telang Usan di Dewan Sekolah Jenis Kebangsaan Cina (SJK) ( C ) Kee Tee, empai lama udah.
Dennis nambah, dibanding enggau ketuai raban bansa, pengawa nyiri ketuai bansa nya siti proses ke amat mar sereta pedis kelebih agi enti ngaul lebih ari siku chalun.
“Aku ngarapka peranak di tetiap genturung pendiau ngatur aum lalu ngiga pemutus dikena milih siku ketuai bansa ke ulih ngetanka penyerakup enggau mai pemanah ngagai semua,”
“Aku enggai isu nyiri tu tau ngasuh peranak di genturung pendiau nya pechah. Nya alai, nya patut diputarka enggau ati ti takluk enggau penyerakup,” ku Dennis.
Bela sama bisi ngulu pengerami tu nya Pemesai Pelilih Menua Telang Usan Baru enggau Ketuai Raban Bansa Kayan, Temenggong Elizabeth Deng, ketuai bansa sereta ketuai raban bansa Orang Ulu Pelilih Menua Telang Usan.
Ba renggat perintah besai, endang PH bekuasa. Tang perintah nengeri kitai, Gabungan Parti Sarawak (GPS) ke bekuasa nyengkaum ngeluarka surat nyiri ketuai raban bansa enggau ketuai bansa.
Dennis Ngau
ADUN Telang Usan