KKM ngenukuka 20 kes rabies ti udah nyadi di Sarawak
KUCHING: Menteri Pengerai Malaysia (KKM) ngenukuka siti kes baru rabies ti ngaul siku lelaki ari Kota Padawan ditu ke udah mati kena ke Hari Tiga bedau lama ke udah, lalu tu ngerikodka 20 iti kes udah nyadi di Sarawak naka ke diatu.
Ketuai Direktror Menteri nya, Datuk Dr Noor Hisham Abdullah madah, lelaki ke beumur 46 taun nya ditukuka dirampit penyakit rabies nengah pansik makmal ti digaga Palan Pemansik Berubat (IMR) kemari.
“Enggau penyinu ati dipadah ke alai iya udah mati kena 7 Ogos urung jam 2.51 pagi lalu KKM ngenataika penyinu ati ngagai sida niang sebilik,” ku iya madah ngagai media nengah siti penerang kemari.
Iya madah, lelaki nya ke kala diketup anak ukui ke ditupi ia ba belakang tapak jari kanan iya kena 15 Jun tu tadi.
“Pekara nya nyadi lebuh iya ke nangkap anak ukui nya ti bekedayau ba luar laman rumah iya,” ku iya.
Hari ke sama, ku Dr Noor Hisham, anak indu lelaki nya mega ke beumur lapan taun sama bela udah diketup ukui nya.
“Anak ukui nya diambi ari siku kaban iya ke diau ba Kuching ujung bulan Mei tu kemari lalu enda temu status sekalika udah dituchuk vaksin anti rabies tauka enda.
Berindik enggau nya, ku iya, kededua seduai beranak tu udah masu abi ketup ukui nya enggau ai sepengelama 15 minit.
Nitih ku iya, anak iya lalu dibai berubat ngagai Klinik Pengerai kena 7 Jun lalu dibai berubat ngagai Klinik Palan Kena Ketup (PBC) di Sepital Besai Sarawak (HUS).
“Hari nangkan ke nya, lelaki nya mai anak iya ngagai PBC lalu udah diberi tuchuk ti keterubah vaksin rabies.
“Semanjai kes mai anak iya berubat sereta beperesa ba klinik dikena nyukupka tuchuk vaksin rabies, niang enda kala madah ngagai bala pengereja pengawa ke alai iya mega udah digigit ukui nya,” ku penerang iya.
Kena 29 Julai, ku iya, lelaki nya berengkah tabin, pedis pala enggau berasai penat ba berang kanan iya.
“Iya udah berubat ba dua Klinik Pengerai ti bebida 31 Julai enggau 2 Ogos tang enda mega madah ke alai iya kala diketup ukui.
“Kena 3 Ogos tu kemari, kes nya lalu dibai ngagai HUS lalu diperubatka ketegal tanda penyakit nya majak lalu udah nya madah ke alai iya (niang) udah kala diketup ukui.
“Berindik enggau nya, iya udah dipasukka ngagai Wad Penyakit Berampit HUS. Gaya kes maya nya majak balat, hydrophobia, aerophobia, tabin, pedia pala, lalu lemi ba jari.
Gaya kes majak balat lalu ngujungka iya mati kena 7 Ogos 2019 urung jam 2.51 pagi,” ku Dr Noor Hisham.
Naka ke diatu, ku iya, anak indu lelaki nya ti udah diketup ukui ke sama gerai lalu agi dalam kemata bala opis pengerai.
“Berindik ari nya, kes nya ditukuka rabies dalam raban mensia di Sarawak kenyau penyakit tu ditemu 1 Julai 2017 lalu enggau nya 20 kes nyengkaum 19 bebadi nyawa.
“Ari 20 kes nya, empat kes iti nyadi taun tu,” ku iya.
Nitih ku Dr Noor Hisham, kes tu nyadi kes ti ke empat mansa ke diketup ukui ti diambi ari orang bukai enggau status tuchuk anti rabies jelu nya enda ditemu.
“Berindik enggau nya, KKM sekali agi ngelalau mensia mayuh kelebih agi di Sarawak ngambika enda ngambi tauka ngumpul ukui sekalika jelu bukai ti enda ditemu status tuchuk vaksin rabies sekalika nya diau ba dalam kandang genturung pendiau.
“Tu laban dipelaban kebuah jelu nya udah dirampit virus rabies lalu nya dalam timpuh nyadi sebedau jelu ngayanka kelai bisi penyakit rabies,” ku iya.
Dr Noor Hisham mega nyemetak madah udah ke masu abi diketup enggau sabun sereta ai sepengelama 15 minit, sida ke dikena ketup mega patu jampat beperesa sereta berubat ba klinik tauka sepital perintah ti semak.
“Semampai nyeliahka diri ari diketup ukui tauka jelu bukai ke alai mayuh kandang endur ba Sarawak tu positif rabies.
“Risiko dirampit rabies ketegal diketup ukui enggau jelu bukai di Sarawak tinggi ke alai Opis Sevis Veterinar Sarawk kala ngeripot 40 persen ari 1,000 iku ukui ti kala dipansik dirampit penyakit rabies positif virus rabies,” ku iya.
Iya mega nambah, diri sebilik mega dipinta madah ngagai lutor tauka bala penguasa pengerai enti bisi bala sida sebilik ke diketup jelu ngambi nentuka ulih meri ubat enggau jampat.
Iya berebak enggau nya nangkan mensia mayuh ngambika seruran nitihka atur bala penguasa lalu meri kerejasama dalam bejalaika Program Kawalan enggau Pencegahan Rabies ti dipejalaika dikena nentuka jalai nyeliahka virus rabies ulih dipejalaika enggau mujur dikena nyapai Sarawak nadai agi rabies.