Kompeni peribit dipinta chakah agi mantu ba penusah angus
MIRI: Kompeni peribit ke bisi bempu tanah ke udah angus ba penusah angus dipinta nganjung mayuh agi orang ngambika nulung raban bomba ngerara api nya.
Kaban Kunsil Nengeri (ADUN) Piasau Datuk Sebastian Ting madah, mayuh agi orang nulung ulih mantu bala bomba ngelengkaska operasyen ngerara api tanah kerapa ba kandang menua ke angus di Kuala Baram.
“Kelimpah ari tulung mensia, kompeni peribit nya dipinta mantu nganjung injin besai sida laban pemisi kereban nya, pengawa ngerara api ulih digaga enggau jampat.
“Ungkup musim sebun ke majak enda manah tu, pelaba aku, kitai begunaka mayuh agi orang dikena mantu bomba. Pia mega, sebedau tu raban polis, soldadu, Opis Volunteer Malaysia (RELA) enggau Raban Penyaga Pengelikun Mensia Mayuh(APM) mega sama datai mantu ngerara api ba kandang menua tu,” ku iya.
Iya madah munyi nya lebuh dikerandau pemberita di Menara Tinjau Tudan ditu kemari pengudah iya mansik gaya penusah angus enggau sebun.
Bisi datai ngulu nyempulang Sebastian nya Ketuai Opis Bomba enggau Penyelamat Malaysia Zon 6 Miri, Penguasa Kanan Bomba I Law Poh Kiong.
Berebak enggau nya, Law madah raban iya begunaka 100 iku agi orang nambah dikena nulung ngerara api enggau lengis ba kandang endur tanah kerapa di Kuala Baram.
Ku iya agi, gaya api ke majak mau enggau jampat nya ukai semina begunaka mayuh orang aja, tang penambah kereban mega beguna amat dikena mantu ngerara api.
“Naka diatu jam 12 tengahari tu (kemari), kami udah nemu bisi 684 hektar tanah kerapa ditu angus lalu sebaka pemesai enggau 1,500 padang main bol.
“Sehari tu (kemari) penusah angus majak nyadi lebuh ditambah 70 hektar agi tanah kerapa angus ngujungka gaya sebun majak enda manah,” ku iya.
Pansik Utusan Borneo kemari mantaika gaya sebun ketegal penusah angus tanah kerapa majak nyadi ngujungka abus terebai ngamahka luar kerita enggau kandang endur rumah.
Nitihka laman web Opis Rampa Menua, pansik gaya angin di kandang endur n Institut Latih Industri (ILP) Miri terus ngerikodka bacha Indeks Pengamah Angin (IPU) ba tikas ke bebadi enggau rikod bacha 396 takat jam 5 lemai kemari.
Pia mega ba kandang menua SK Kuala Baram 2 enggau Miri ngerikodka bacha IPU agi likun iya nya 84 enggau 96.