TSABH, TSAKCH bisi palan baru di Kota Samarahan pemesai 7.5 ikar
KUCHING: ‘The Salvation Army Boy’s Home’ (TSABH) enggau ‘The Salvation Army Kuching Childrens Home’ (TSAKCH) deka dipindahka ngagai palan ke baru ke diberi perintah nengeri di Kota Samarahan enggau pemesai tanah palan nya 7.5 ikar.
Menteri Pengelantang Pendiau, Raban Bansa, Orang Indu, Ruang Bilik enggau Pemansang Anak Mit Dato Sri Fatimah Abdullah madah kededua palan nya agi bejalaika operasyen ba Jalai Uplands enggau Jalai Ban Hock.
“Tang, Kepala Menteri nengah Unit Pekara Pengarap Bukai (UNIFOR) udah setuju deka meri bantu sepenyampau RM4 juta dikena tuju mindah lalau nyendia perengkaguna ke baru ungkup kededua palan nya.
“Borneo Medical Centre (BMC) mega udah madah penyanggup ati sida meri bantu sepenyampau RM2.6juta ngagai The Salvation Army ungkup tuju ke sebaka.
“Kelimpah ari nganti palan nya kediatu, kami mega benung ngiga orang ke sanggup meri servis ngagai orang tuai ari raban orang ke tengan umur ba dalam komuniti,” ku iya bejaku ba pengawa ‘The Sound of Music 3.0’ di Palan Konvensyen Borneo Kuching (BCCK) ditu kemari.
Iya madah, penyamai diungkup ngagai bala orang tuai disikap berindik ari statistik penyampau bala rayat ti tuai umur majak mayuh dalam beberapa taun ti deka datai.
Konsert ‘Sound of Music 3.0’ nya siti ari pengawa konsert pengasih ti diatur enggau tuju dikena ngangkatka pemereti ati seraya bejalaika pengawa pengasih ngagai sida ti beguna ba ‘The Salvation Army’ ti udah berengkah nyendiaka servis nya kenyau taun 1950 suba.
Sida ti bisi ngulu konsert tu datai ari orang ke benama enggau bala kaban Gerempung Rotari Kuching Central ti diatur lalu disukung Palan Bebelika Barang Plaza Merdeka enggau Hotel Waterfront.
Entara ke bisi merindang ba konsert malam nya, iya nya Nisa Addina, South Norfolk Youth Symphonic Band (United Kingdom) enggau SAINSKU WINDS.
Sama bisi ngulu pengawa nya, Direktor Ngatur Plaza Merdeka Holdings Sdn Bhd Datuk Steve Ng Thian Yew, Panglima Teritorial Singapura, Malaysia enggau Kandang Menua Myanmar, Kolonel Rodney Walters; Chairman BMC Dr John Chew Chee Ming; Direktor Ngatur BMC Dr Peter Tang; Direktor Eksekutif BMC Robert Lau; enggau Presiden Gerempung Rotari Kuching Central Leonard Sia.
Tu edisyen ti ketiga Sound of Music, sepengudah taun 2012 enggau asil pupu pengasih ti sepenyampau RM1 juta mujur digumpul dikena ‘Anjung Kasih’ enggau Rumah Dahlia di Sepital Besai Sarawak (HUS).
Ba taun 2016, edisyen ti kedua konsert nya mujur ngumpul sepenyampau RM500,000 ungkup diberi ngagai Yayasan Jantung Sarawak dikena manti bala orang ke sakit ti kurang penatai pemisi lalu begunaka pengawa berubat ungkup penanggul jantung.