Bacha IPU ba tikas 390 udah ba kategori enda likun ke pengerai
SIBU: Bacha Indeks Pengamah Angin (IPU) ba tikas 390 iya nya udah ba kategori ti enda likun, lalu nembiak mit, orang tuai, orang ke nginsap, orang ke sakit jantung enggau lempuang jampat agi deka sakit.
Ba pekara tu , Sapit Menteri Pengerai Dr Lee Boon Chye nambah tu mega tau ngasuh mata orang nya merah enggau rekung rangkai.
“Semua orang patut ngurangka diri keluar rumah semina enti bisi pekara ke enda ulih diseliahka. Kena ‘mask’ lebuh bejalai ke luar. Irup ai mayuh semina orang ke sakit jantung tau enda.
“Ungkup bala sida ke sakit jantung, patut minta lalau ari klinik ke semak ,” ku iya madah ngagai The Borneo Post lebuh dikerandau kena Hari Enam.
Dr Lee dipinta ngelalau mensia mayuh lebuh bacha IPU datai ba tikas ti enda likun.
Nitihka rikod jam 4 lemai kena Hari enam, IPU di stesyen ILP( Institut Latih Industri) Miri mandangka bacha 390 , lalu ke bukai di SK Kuala Baram 2 ngerikod enggau bacha iya 136.
Iya nambah enggau IPU (bacha) 300 ke atas- sekula patut ngetuka semua aktiviti luar enggau berundingka nutup enda lama.
Dr Lee madah dia bisi atur ke udah ditetapka Opis Menteri Pelajar ba pekara nya lalu kemaya deka nutup sekula lebuh ba tikas bacha IPU ke patut.
Berebak enggau nya, siti penerang ari laman ‘Asean Specialised Meteorological Centre’ (ASMC) kenaka 10 Ogos madahka bisi ujan ngelingi rantau Mekong.
Gaya hari di rantau selatan Asean kemarau lalu ba utara Sumatra bisi ujan mimit. Palan ke tebal enggau sebun asap iya nya di Riau enggau Pulau Bangka, Sumatra enggau Sarawak.
Di Barat enggau Kalimantan sentral , sekeda palan ke dikira ‘hotsopt’ mendap nya semak Pontianak enggau Palangkaraya diperati likun ke sebun asap tebal. Sekeda sebun asap ari Kalimantan barat udah dibai angin ke barat Sarawak. Pia mega, hotspot ke mit enggau sebun asap ke ditemu ba mayuh bengkah bagi menua di Kalimantan.
Gambar satelit nunjukka bisi 116 palan ke pemadu angat nya di Borneo iya nya Kalimantan 101 buah enggau 15 buah di Sabah enggau Sarawak kena 10 Ogos tu tadi.
Maya jam 3 lemai kemari, IPU mantaika ILP Miri enggau bacha pemadu tinggi iya nya 395, ditangkan Samarahan (94), Miri (93), Kuching (88), Sri Aman (86), Mukah (85), Sibu (77), Bintulu (76), Sarikei (73), Kapit (63), and Limbang (58).