Penusah angus semak KKH dipelabaka ketegal ditunu orang
MIRI: Penusah angus ti nyadi ba kandang endur ke semak enggau Komplek Pengintu Pengelantang Hamidah (KKH) ditu dipelabaka angus ketegal ditunu orang.
Penulung Direktor ba Operasyen Pengerara Api enggau Penyah Penusah, Opis Bomba enggau Penyelamat Malaysia (JBPM) Nengeri Sarawak Penguasa Kanan Bomba I Tiong Ling Hii madah kebuah penusah angus nya nyadi dipansik bepelasarka sekeda bukti ke udah ditemu.
“Penusah angus nya berengkah ari kandang endur tengah lalu ukai bepun ari ba tebing jalai alun tauka sebarang akses.
“Raban pengerara api bisi tetemuka tumbul pintu ke diikat enggau rumput rangkai dikena nunu ba kandang tanah Naim Development lalu berindik ari nya, siti ripot polis udah digaga ngambika pengawa mansik dipejalaika udahnya,” ku iya ba pengarang berita ensana.
Operasyen ngerara api di Lot 3709( semak Komplek Pengintu Pengelantang Hamidah) ke berengkah 1 Ogos tu tadi agi dipejalaika nyentuk ke ngagai kemari ti mungkur 32 raban bomba nyengkaum tulung ari 11 iku pekereja Naim.
Tiong madah kemari bomba naka ulih ngerara api ba babas ke nyadi di tebing jalai alun ke nuju ngagai Kuala Baram.
“Tu dikena nyeliahka sebarang pekara ke nyadi baka bebadi ba jalai alun ketegal asap ke tebal ngachau mata meda jalai sepanjai nya.
“Pia mega raban ke mantu ari Naim neruska kereja ngelara api di kandang endur Institut Latih Industri (ILP),” ku iya.
Iya madah, pemesai kandang ke agi berasap ba endur ke semak enggau Komplek Pengintu Pengelantang Hamidah nya urung 50 ekar enggau agi berasap.
“Pemesai ke ulih dirara nya 15 ekar lalu sekeda 35 ekar ke bukai deka diteruska ngena ‘jengkaut’.
“Ba kandang endur Lot 3079, Lot 4041, Lot 4042 enggau kandang endur ke semak ba palan nyemai Naim agi berasap dalam pemesai 70 ekar,” ku iya nerang.
Berebak enggau nya, naka ke diatu bisi 89 ekar kampung semak Kampung Sedi, Pulau Bruit, Tanjung Manis abis angus kenyau 7 Ogos tu tadi.
Tiong madah, sepenyampau 40 iku raban bomba nyengkaum peranak genturung pendiau nulung ngerara api kampung nya.
“Sehari tu (kemari) sebuah rumah ke puang di Kampung Sedi angus abis ketegal penusah angus kampung nya lalu bisi tiga buah rumah agi enda rampit api.
“Raban ngerara ngaga ‘fire break’ enggau bantu ‘jengkaut’ sida ke betanam kepala sawit semak dikena nagang api nya ngerampit ngagai kandang rumah di Kampung Sedi,” ku iya.
Takat kemari, bisi 216 iti kes penusah angus babas, kampung enggau tanah kerapa diterima JPBM di selampur Sarawak nyengkaum 33 iti kes ke dirikodka kemari takat jam 4 lemai.
Nitihka semua iya JBPM ngerikodka 21 iti kes penusah angus babas tetiap hari.
Ba pekara ke bukai ti bekaul, ILP Miri ngerikodka bacha Indeks Pengamah Angin(IPU) ke enda manah enggau pemutus bacha iya 390 takat jam 4 lemai kemari.
Nitihka laman web Opis Rampa Menua, kandang SK Kuala Baram 2 ngerikodka bacha IPU enda manah iya nya 136, lalu Miri ba kategori agi likun enggau bacha IPU 78.
Bacha IPU entara 0 ngagai 50 dikategori manah, 51 ngagai 100 (agi likun), 101 ngagai 200 (enda manah), 201 ke 300 (pemadu enda manah) lalu 300 ke atas (enda likun).