Komuniti ti diau di mengeri patut seruran ngetanka adat, main asal
Sida mega patut taluk sereta temegah ati enggau adat sereta main asal ngambika enda lenyau diserunyut jeman, ku Lee
MIRI: Komuniti menua pesisir ke diau ba Miri enggau kelebih agi ti diau di mengeri diatu patut seruran ngetanka sereta ngelakuka adat enggau main asal sida.
Sida mega patut taluk lalu berasai temegah enggau adat sereta main asal sida,ku Menteri Muda Dagang Temuai, Seni enggau Main Asal Datuk Lee Kim Shin.
“Kitai enda patut enda ingat ke asal kitai nyengkaum adat enggau main asal. Ketegal nuan ke diau ba mengeri, ukai reti nuan enda ingat lalu ninggalka main enggau adat asal raban bansa nuan empu. Tu enda patut nyadi- kitai patut ingat ke nya,” ku iya bejaku lebuh bejadika Hari enggau Diri Sebilik Uma Beluvuh Long Panai bepalan ba Resort Indin Luak Bay ditu kilah ensana.
Lee muji bala raban komiti pengatur ketegal komitmen ngatur program nya, ke alai iya madah program nya tuju ti
Menteri Muda Dagang Temuai, Seni enggau Main Asal
beguna bendar dikena ngerapitka kaul ba dalam raban bansa menua pesisir.
“Aku temegah ati enggau komitemn ti besai ke dipandangka bala peranak menua tu dalam bejalaika aktiviti ti enggau tuju ngempung lalu ngemansangka raban bansa menua pesisir, kelebih agi di Miri sereta ngetanka main enggau adat asal sida.
“Ti siti ari pengarap enggau juluk ati kami ke alai main enggau adat asal ti manah tu patut ditanka,” ku Lee lebuh ke ngulu pengerami mandangka musik enggau tanda Orang Ulu.
“Adat enggau main asal tu patut dikemeran ngambika ulih dibantai ngagai orang datai enggau bala temuai. Sida mega patut ngaga promoso pemakai sida ngambika bala orang ke datai ari luar ulih nyepi pemakai asal sida.”
Program nya mega enggau tuju ngayanka Uma Beluvuh Long Panani ngagai bala nembiak sereta bala kaban sida ba menua nya.
“Mayuh ari anak kita, aku pechaya, dikemesaika ba sekeda mengeri lalu sida nadai peluang pulai tauka nemuai ngagai rumah panjai sida.
“Ngagai kita ke diau di mengeri, lita nyangka diau ba mengeri ti sama tang kita nadai awak betemu. Tu ketegal pengawa ti mayuh enggau gaya pengidup ti kiruh,” ku Lee.
“Nya alai, aku deka nangkan ngambika kitai terus betemu enggau begulai enggau bala ke bukai kelebih agi maya ujung minggu. Sida ulih pulai ngagai rumah panjai sida lalu betemu enggau diri sebilik sereta kaban belayan ke bukai.
“Sida mega ulih nyungkak penatai pemisi tambah enggau nyual sekeda asil sida baka asil tanam buah rian, lensat enggau abok lalu udah nya mai asil nya ngagai mengeri ungkup ke dijual lalu ulih dilakuka agi ba jemah ila,” ku iya nambah.
Kitai enda patut enda ingat ke asal kitai nyengkaum adat enggau main asal. Ketegal nuan ke diau ba mengeri, ukai reti nuan enda ingat lalu ninggalka main enggau adat asal raban bansa nuan empu. Tu enda patut nyadi- kitai patut ingat ke nya.
Datuk Lee Kim Shin