Perintah nengeri dipinta ngemanah bekal ai, elekterik di Long Lama
LONG LAMA: Bisi 3,500 iku peranak Long Lama deka perintah nengeri ngangkatmanah bekal ai enggau elekterik ba maya tu laban bekal perengkaguna nya kediatu agi bedau chukup.
Naka ke diatu, bekal elekterik ba kandang menua nya enda chukup ungkup ke diguna di pasar Long Lama nyentuk ke Long Laput enggau rumah panjai Sungai Dua, laban agi bekenaka injin api lalu sistem nganjung bekal elekterik lama.
Kaban Kunsil Nengeri(ADUN) Telang Usan, Dennis Ngau ke ngari peranak kandang menua nya madah, penanggul tu ngujungka kandang menua nya suah putus bekal elekterik.
Ku iya, tu udah ngenusahka urung 3,500 iku peranak kelebih agi bala ke bedaja, nembiak sekula enggau pengereja pengawa sekula di Sekula Sekondari (SMK) Long Lama, Sekolah Jenis Kebangsaan(SJK) China Kee Tee enggau Sekula Primari(SK) Ubong Emang. Kelimpah ari nya, Klinik Satelit Long Lama, opis perintah enggau komuniti Long Lama.
“Aku ngarap Sarawak Energy Berhad deka nyambung Long Lama ngagai grid besai,” ku iya lebuh ngenataika peminta peranak kandang menua nya maya bejadika Jematan Tan Sri Pehin Adenan Satem di Dewan SJK (C) Kee Tee, bedau lama udah.
Kelimpah ari nya, peranak endur nya suah nadai bekal ai lalu deka perintah ngangkatmanah bekal ai.
Tetiap kali musim kemarau, Opis Pelilih Menua Long Lama enggau Opis Pengintu Pengelantang Miri deka ngambi bekal ai ari ‘loji rawatan air’ lalu nganjung ngena tangki ngagai rumah panjai ke semak ti nadai ai.
Dennis mega ngelanggur ngambika perintah berundingka ngaga stadium lumba main ke disikap enggau lumba main genturung pendiau di Palan Pemansang Luar(RGC), Rumah Sakai tauka Anjung Kasih sereta trek belanda di SMK Long Lama.
Ku iya, stadium nya disadang beungkus RM10 juta ngagai RM15 juta lalu ulih dikena ngatur aktiviti baka kem nembiak, gerija, pengerami etnik, latih enggau kus.
Sentang Rumah Sakai tauka Anjung Kasih, iya ulih nyendiaka palan endur diau ngagai peranak menua pesisir ke berubat di Klinik Satelit Long Lama.
“Peranak ke diau jauh ba ulu suah agi numpang perengka pengangkut kompeni balak, tang perengka pengangkut nya nadai mai pulai baru. Tu ke ngasuh sida tepanggai lalu tinduk ba sebarang endur,” ku iya.