JTK deka ngatur Program JKK 3.0 kena 14 nyentuk 19 Ogos
KUCHING: Opis Pengereja Pengawa (JTK) Sarawak deka ngatur Program ‘Jelajah Kerjaya Kenyalang’ (JKK) 3.0 kena 14 Ogos nyentuk ke 19 Ogos tu lalu mungkur empat palan ti bebida serata Sarawak iya nya Bagi Menua Samarahan, Betong, Sibu enggau Miri.
Sapit Direktor opis nya, Sulaiman Ismail madah, bisi 93 pengaji nyendiak ngelui 4,000 pengawa puang ngagai bala ke bisi begiga ke pengawa lebuh program nya ke diatur.
Tuju program nya, ku iya, dikena mantu rayat nengeri tu ngiga kereja sereta pangku pengawa ti ulih ditangkup sida.
“Konvoi JKK 3.0 deka mai servis perintah sereta peluang kereja terus ngagai rayat nengah program ‘outreach’.
“Entara empat palan ti bgatur program tu iya nya Palan Bebelika Barang Summer, Kota Samarahan kena 14 Ogos, Dewan Panglima Rentap , Betong (15 Ogos), Dewan Kompleks Islam Sibu (17 Ogos) enggau Stadium Tertutup Miri (19 Ogos),” ku iya nengah siti penerang ngagai media kemari.
Nitih ku iya, ke empatempat palan nya deka ngatur ‘Program Karnival Kerjaya’ enggau tetiap palan nyendiaka mayuh bengkah pengawa puang ari mayuh macham industri.
“Kesemua program nya berengkah jam 8 pagi. Program tu siti ari program diatur ari Program Jelajah Kenyalang 2.0 taun 2017.
“Tu taun ti ketiga program nya diatur JTK Sarawak ari Opis Menteri Pengatur Pengereja Pengawa,” ku iya.
Sulaiman madah, mayuh bengkah aktiviti deka diatur lebuh program nya entara iya nyengkaum sesi interbiu tebuka pengaji ngiga pengereja pengawa, ngerejista ngiga pengawa puang online dalam portal JobsMalaysia, beperesa pengerai, livha kerejaya enggau mayuh agi.
Tambah iya, Sapit Menteri Pengatur Pengereja Pengawa, Dato’ Mahfuz Omar disadang datai bejadika program sereta ngelancharka konvoi JKK 3.0 di Palan Bebelika Barang Summer kena 14 Ogos.
“Berindik ernggau nya, mensia mayuh kelebih agi ngagai bala ke benung begiga ke pengawa puang ari mayuh bengkah penau akademik tauka sida ti udah bisi pengawa tang deka ngangkatka karier sida dikelaluka datai ngulu program tu,” ku iya seraya nambah madah masuk ngagai program nya enda bebayar.
Iya mega ngelalau mensia mayuh tauka bala orang ke begiga ke pengawa puang ngambika begari manah sereta mai resume enggau salin dokumen ti bekait lebuh ke datai interbiu.