Perintah Sarawak nganti hari bulan aum Komiti Pemandu MA63 ke ditetapka Menteri besai
KUCHING:PerintahSarawak benung nganti hari bulan ti deka ditetapka Menteri Besai Tun Dr Mahathir Mohamad dikena aum Komiti Pemandu Sempekat Malaysia 1963 (MA63) ungkup aum ke udahnya.
Menteri Muda di Opis Kepala Menteri (UndangUndang, Kaul Sarawak enggau Perintah Besai sereta Matau Projek) Sharifah Hasidah Sayeed Aman Ghazali madah, naka ke diatu sida benung nganti Menteri Besai ngagau Komiti Penyanding Penemu MA63 Sarawak.
“Iya ke amat, sigi bisi siti aum komiti Orang Deriba Perengka Pengangkut ba dalam taun tu.
“Taja pia, kitai nganti Menteri Besai madahka hari bulan aum nya,” ku iya lebuh dikerandau pengarang berita pengudah bejadika pengawa ‘ Program Pecutan Akhir Ujian Penilaian Sekolah Rendah (UPSR) 2019’ Sekula Primari (SK) Agama Datuk Haji Abdul Kadir Hassan ba Palan Pemadah Islam (IIC) ditu,, kilah ensana.
Ditanya sekalika bisi aum Komiti Orang Deriba Perengka Pengangkut M63 deka diatur beserimbai Hari Malaysia kena 16 September bulan bar utu ila, iya nyaut enggau pandak, ‘Insya-Allah’.
“Ngarapka ulih kali tu (16 September). Tang nya bepanggai ba Menteri Besai ngaga pemutus,” ku iya.
Sarawak deka nyadi tuai rumah ngatur pengerami Hari Malaysia kena 16 September bulan tu ila ke dipelaba deka digulu Yang di-Pertuan Agong Al-Sultan Abdullah Ri’ayatuddin Al-Mustafa Billah Shah sereta Menteri Besai.
Berebak enggau nya, iya madah sida diatu benung nyendiaka ripot kepenudi ti deka dikerandau ba dalam komiti Orang Deriba Perengka Pengangkut MA63 ila.
“Taja pia, aku enda ulih mansutka ripot kepenudi nya laban nya pekara ke berat” ku iya.
Berindik enggau nya, bejaku sentang pengawa nya, Hasidah ngarap SK Agama Datuk Haji Abdul Kadir Hassan ulih ngenanka prestasi ‘Gred Purata Sekolah’ (GPS) 1.8 taun nyin tadi.
“Aku dipadah sekula tu entara sebengkah sekula jalai pengarap ke pemadu manah di Malaysia ba dua tahun nya ari taun 2017 enggau 2018.
“Nya alai, kitai andal ati ngagai bala nembiak ngambika ulih napi peresa UPSR sekali tu lalu ulih nyendiaka diri enggau manah sereta ngetanka penyulut ke nyadi sekula jalai pengarap ke pemadu manah di menua tu sekali agi,” ku iya.
Ba program nya ,iya mega bisi meri geran sepenyampau RM5,000 ngagai Opis Pengatur Pengawa Sekula SK Datuk Haji Abdul Kadir Hassan.
Sepenyamau 170 iku nembiak sekula SK Datuk Haji Abdul Kadir Hassan nyengkaum nembiak sekula di sekula ke semak ngulu program nya.
Bela sama bisi ngulu nya, Chairman Opis Pengatur Pengawa Sekula SK Datuk Haji Abdul Kadir Hassan, Awang Mohd Najib Awang Chee enggau Kepala Pengajar SK Datuk Haji Abdul Kadir Hassan, Mohammad Nassir Said.