40,000 iku indai ti beranak taun baru deka dibantu

Dikena ngelempungka tating ungkus ngintu indai enggau anak mit nya pengudah indai ke beranak, ku Abang Johari

KUCHING: Perintah nengeri deka meri bantu khas ngagai urung 40,000 iku bala indai ti beranak taun baru.

Kepala Menteri Datuk Patinggi Abang Johari Tun Openg madah, taja pia penyampau nya bedau ditentuka lalu pekara silik sentang bantu nya deka dipadahka maya bejuraika Bajet Nengeri 2020 November tu.

Ku iya, bantu nya deka diberi ngagai semua indai di nengeri tu nyengkaum indai ti bekereja, nguan rumah aja enggau ti begunaka bantu.

“Taun tu aku deka madahka bantu ngagai semua

indai ti beranak. Kami nganggarka 40,000 ibu deka nerima bantu tu bepelasarka puku rata pengada 40,000 setaun di Sarawak.

“Penyampau bantu tu deka dipadahka aku dalam Bajet Nengeri ujung taun tu laban diatu kitai agi ngitung berapa penyampau ke patut diberi,” ku iya.

Iya madah munyi nya lebuh dikerandau media pengudah bejadi ‘Ibadah Korban N8 Satok’tidiaturBiroAgamaParti Pesaka Bumiputera Bersatu (PBB) N8 Satok di Kompleks Lumba enggau Main Satok, Padang Slps ditu, kemari.

Ku Abang Johari, perintah nengeri ke ari baruh pegai Gabungan Parti Sarawak (GPS) meri bantu nya dikena ngelempungka tating ba ungkus ngintu indai enggau anak mit nya pengudah ke beranak nyengkaum dikena meli ampin enggau ke bukai.

Dulu ari nya, lebuh iya ke bejaku, madahka perintah nengeri diatu udah meri Endowment Fund Sarawak (EFS) sepenyamoau RM1,000 ngagai retiap iku anak mit ti diada di Sarawak taun tu.

Duit turu nya ku iya, diberi ngagai anak mit peranak Sarawak enda ngira bida ba jalai pengarap enggau umur.

“Berindak ari nya, dalam Bajet Nengeri taun tu, aku deka nambahka siti agi bantu khas ngagai indai ti napi penanggul (belanja) maya ke beranak laban ungkus pengidup majak besai.

“Nya ukai EFS tang bantu khas ungkup raban indai laban bisi bala indai ke bekereja begaji hari enda dibayar gaji ninting bulan sekumbang ke kemisi beranak. Nya alai, tu nyadi tating ba sida.

“Aku deka bisi siti polisi dikena mantu bala indai enda ngira sekalika indai nya bekereja tauka enda bekereja,” ku iya.

Berebak enggau nya, Abang Johari madahka perintah nengeri merambu deka numbuhka sekula khas ungkup anak mit ke bisi penanggul autisme sereta enda ulih nitihka pelajar bukai.

“Aku udah minta Menteri PengelantangPendiauKomunti, Orang Indu, Ruang Bilik enggau Pemansang Nembiak Mit, Dato Sri Fatimah Abdullah ngaga ripot nyengkaum pengelandik ngajar ke diguna dikena numbuhka sekula tu.

“Aku mega udah nganjung Fatimah ke Austaralia ke tuju nya lalu pengudah pansik dipejalaika, engka kitai ulih numbuhka sekula khas ungkup anak mit ke napi penanggul nya,” ku iya.

Ba ti mpuh ke sama ku iya, Perintah Sarawak bela berunding deka nganjung pengajar turut ke Australia ngambika dilatih ngambi negapka pengelandik maya mutarka bala nembiak ti ngembuan ulah nya .

Ba pengerami nya, Abang Johari bela bisi magi dagin korban ngagai 210 penerima di Satok.

“Taun tu aku deka madahka bantu ngagai semua indai ti beranak. Kami nganggarka 40,000 ibu deka nerima bantu tu bepelasarka puku rata pengada 40,000 setaun di Sarawak. ” Datuk Patinggi Abang Johari Tun Openg Kepala Menteri