Ambi insuran ngambi bisi nyadika penabat maya dituntung penusah
LONG IKANG: Semua peranak rumah panjai ba kandang menua Telang Usan dilalau ngambi insuran nyadika penabat enti sema rumah sida angus tauka dituntung penusah ngenyit.
“Bisi 83 buah rumah panjai ari Logan Sibong nyentuk ke Long Palai di Batang Baram; Long Batan nyentuk ke Apau Nyaring di Sungai Tinjar; Long Bemang ke Long Bedian nyentuk ke kandang menua Layun, Patah-Abang, Sungai Akah, Sungai Pelutan enggai pemisi urung 50 ribu iku peranak ke bisi nguan kandang menua nya.”
“Enggau pemisi insuran, urung beribu iku peranak ke nguan kandang menua Telang Usan bisi penabat ari penusah angus, bah enggau ribut kudi. Bala sida ke napi penusah nya ulih ngena duit pampas nya seraya ke nganti bantu,” ku iya.
Dennis madah munyi nya ba pengawa nyuaka pampas insuran Allianz Skim Kampungku ngagai dua ari tiga iku penerima ke napi penusah angus di Long Ikang, kemari.
Tetiap iku penerima bisi nerima pampas sepenyampau RM11,000.
Iya madah, Long Ikang nya keterubah iya rumah panjai ke bisi nerima pampas insuran ba kandang menua Telang Usan.
“Kitai enda ulih nyadang nama ti deka nyadi ba dudi hari, tang peranak rumah panjai tau bejejaga sereta ngambi insuran dikena nyaga reta tengkira sida.”
“Dalam pekara tu, aku muji chara peranak Long Ikang ti berunding enggau jauh ngambi insuran. Aku ngarapka mayuh agi peranak ba kandang menua Telang Usan bechuntoka sida,” ku iya bejaku.
Iya mega muji pemanah pegai Ketuai Kampung Catherina Madang ti disukung komiti besai enggau Komiti Pengelikun enggau Pemansang Genturung Pendiau (JKKK) ti ngatur adat ngagai ruang bilik rumah panjai nya ti nyadika pun kebuah penusah angus nya nyadi.
Ku iya, bejalaika adat rumah panjai nya ukai ukum tang dikena ngelalau semua peranak rumah panjai ke alai pengelikun rumah panjai nya siti ari tanggungpengawa semua lalu enda tau enda dikemeratka.
“Meri pengaga ati ngagai KK Catherina Madang enggau JKKK rumah panjai ti udah ngaga pemutus numbuhka Raban Bomba Volunter Long Ikang. Aku ngarapka peranak rumah panjai tu meri sukung ngagai pengawa meli perengka pengerara api ungkup raban tu,” ku iya.
Dennis ngarapka duit pampas nya enggau bantu ari Perintah Nengeri Sarawak nengah Opis Pengelantang Pendiau Sarawak ulih dikena enggau jampat ngaga sentang bagi rumah sida ti angus.
Berindik enggau nya, peranak rumah panjai ari Telang Usan ti deka nyereta pelin insuran ulih minta Pom Allianz KampungKu Insurance di Palan Servis Komuniti Parti Pesaka Bumiputera Bersatu (PBB) Telang Usan di Luak Bay.