Perintah Sarawak dipinta nyendiaka tanah pendam
KUCHING:GerempungBansa Dayak Sarawak (SDNU) minta perintah Sarawak nyendiaka tanah pendam alai nguburka orang datai luar Kuching ti mati ditu, pia ku Presiden SDNU Tan Sri William Mawan Ikom.
“Kitai deka minta perintah nengeri ngemendarka beberapa ikar tanah nyadi pendam. Tu nyadi saut ngagai sekeda isu ti mungkur kubur sekeda orang ti datai ke kuching ari jauh, lalu sida ti nadai jalai pengarap tauka sida ti nadai berejista enggau gerija besai,”ku iya madah ngagai The Borneo Post kemari.
Mawan madah, SDNU begulai enggau Gerempung Ketuai Raban Bansa enggau Tuai Rumah Bagi Menua Kuching (Pemaik) deka nentuka haribulan ngatur aum sentang pekara nya sebedau mantaika pemutus ngagai Sapit Kepala Menteri, Datuk Amar Douglas Uggah embas, iya ke ngatur pekara jalai pengarap bukai kelimpah Islam.
Iya madah munyi pengudah SDNU, Pemaik enggau Serakup Dayak Iban Sarawak (Sadia) Kuching nerandau enggau orang ti berumah nadai pemendar ba tanah pendam ke diempu SDNU ba Lurung Chawan 13, Jalai Foochow ditu.
Mawan madah SDNU deka ngangauka Opis Tanah enggau Survei Sarawak, Kaunsil Bandaraya Kuching Selatan, Opis Pengelantang Pendiau Sarawak enggau ejensi perintah ti bekaul datai ngulu aum sentang mutar penanggul orang ti berumah enggau nadai pemendar ba tanah pendam nya ba Hotel UCSI ditu, pengudah haribulan ditetapka.
Baum sereta betemu enggau sekeda ejensi tu beguna bendar laban orang ke diau nadai pemendar tu berumah ba tanah ke diempu SDNU,ku Mawan.
Iya mega nadai ngenggaika pengawa ti mindahka pendam lama nya ngagai palan m eruan agi enti udah datai maya nya ila ku iya: “Bisi maya ila kitai negikahak kitai ba tanah kitai empu.”
Ngaga palan pengentap pendiau baru orang ke diau ba tanah nadai pemendar nya siti dikemeratka lalu sebagi ari juluk SDNU enggau Komiti Pemansang Mengeri Kuching (KUPC) ti betuaika Temenggong Dato Bernard Agan dikena munaska penyeranta di bagi menua tu, ku iya.
Bisi 61 ruang bilik ke diau di tanah nadai pemendar ba tanah pendam Lurung Chawan 13 lalu dikelala mega enggau nama Pendam Tusur tauka Pendam Gena.
“Bakani kitai beratka orang ke udah mati, baka nya mega kitai beratka pengidup,” ku iya.
Mawan ke mega Kaban Kunsil Nengeri Pakan madah, patut bisi pengawa ti nyendiaka diri enggau manah ukai semina ungkup ngagai orang ke idup tang mega ngagai sida ke udah mati ba Pendam Tusur sebedau semua gerempung nya ngenataika peminta lalu betemu enggau perintah Sarawak.
Kelimpah ari Mawan enggau Bernard, sama bisi datai ngulu randau nya Presiden Sadia Pampang Kuching Datuk Paduka Anthony Nait, Ketuai sapit Presiden SDNU Datuk Lt Gen (Rtd) Stephen Mundaw ke mega penyanding penemu KUPC, Sekretari Politik Kepala Menteri Petrus Igat Matthias enggau Ketuai Publisiti KUPC Sylvester Wit Malang sereta sekeda ketuai raban bansa Bagi Menua Kuching.
Lebuh ke bejaku, Bernard madahka perintah deka mantu orang ke diau nadai pemendar tang sida dipinta liat ati nganti laban KUPC begunaka data ti komprenhensif dikena nentuka nadai tinggal lalu, seraya Petrus ngansak kaban politik ari barang bagi parti politik nngambika anang bepolitikka isu nya tauka nuntut nenama ke penguntung jalai politik sida.