PBK deka ngepunka klinik undang-undang nengah bantu Dr Te Whetu O Rongo

KUCHING: Parti Bumi Kenyalang (PBK) deka ngepunka klinik undang-undang ungkup rayat nengeri tu ngambika meretika hak sida.

Klinik deka dipunka nengah bantu ari luyar antarabansa ari Amerika Syarikat (AS), Dr Te Whetu O Rongo.

Ku Presiden PBK Voon Lee Shan, Rongo siku luyar ke chukup landik sereta ngembuan lebih ari 300 iku luyar ke ari baruh iya.

“Dr O Rongo siku tebangkar hak asasi, pakar undang-undang sereta deka mantu kitai ngulihka baru hak nengeri itu ti udah lenyau ari baruh Sempekat Malaysia 1963 (MA63).

“Agi mayuh pengeraja asal enggau hak kitai ti bedau dipulaika lalu kitai deka ngambi nya pulai nengah bantu enggau lalau penemu bakih aku Rongo,” ku iya.

Iya bejaku munyi nya ba Pengerami Makai Lemai Keterubah Komiti Besai PBK di sebuah hotel tebilang ditu malam ensanus.

Ba pengerami nya, PBK bela bisi ngumpul sain jari dikena ngenataika petisyen ngagai Menteri Besai ngambi ningkilka menteri pelajar enggau sapit iya enggau lengkas.

Petisyen nya berindik ari pemutus mantaika kaligrafi khat nyadi mata pelajar Bahasa Melayu Primari Empat.

Urung 1,000 iku penyukung enggau kaban PBK datai ngulu pengerami nya seraya ngumpul duit turu ungkup parti sereta ngerejista kaban baru.

Sama bisi datai, Sapit Presiden Peli Aron, Man dal Presiden Peter Asut, Sekretari Besai Priscilla Lau, Tukang Wang Besai, Jamie Tiew Yen Houng enggau bala bukai.

KENANG MANIS: Bala komiti kaunsil besai PBK betuaika Voon (lapan kiba) begambar begulai beserimbai enggau pengerami makai lemai keterubah di Kuching ensanus.

PAMPAS: Dennis Ngau (lima ari kanan) nyuaka chunto chek ngagai siku orang ke napi penusah angus di Long Ikang, Baram Ili kemari.