25 ikar Kampung Galau Sabal ditanam enggau 13 bansa buluh
KUCHING: Bisi 25 ikar kandang Kampung Galau Sabal semak enggau Balai Ringin udah ditanam enggau 13 bansa buluh kenyau enam bulan ke udah.
Sapit Menijar Besai Ngatur Asil, Kaunsil Pemansang Pengawa Dagang Kayu Ramu Sarawak (PUSAKA) Hamzah Morshidi madah nya dipejalaika nyadi projek keterubah sida dikena ngasilka produk baru di nengeri tu kelimpah ari kayu.
“Kitai dalam proses mandangka produk baru di Sarawak laban sebedau tu nengeri kitai (Sarawak) mayuh bepanggai ba asil pengeraja asal.
“Nyadi diatu, kitai benung dalam nguji nanam baru kampung enggau buluh,” ku iya lebuh ke dikerandau di program Ibadah Qurban ke diatur Surau PUSAKA ba Kompleks Industri Perabot PUSAKA (KIPPKS), Kota Samarahan kemari.
Entara bansa ti di tanam iya nya buluh bansa ‘Dendrocalamus Latiflorus’, ‘Gigantochloa Levis’, ‘Bambusa Nana’, ‘Dendrocalamus Asper’ enggau ‘Schizostachyum Brachycladum’.
Pengawa bejalaika program nya udah diatur nengah bantu ari 18 ejensi ti bekaul ba baruh komiti SABIT.
Sebedau nya, bedau lama ke udah penemuai ngagai Anji udah digaga, Kandang Menua di China dikena ngelaluka sebuah kilang ngaga produk ari buluh muka pampang di Sarawak.
Perambu nya dipejalaika nengah bantu MATRADE sereta ‘Shangai Chinese Chamber’ enggau ngatur sesi licha enggau dialog dikena meda pengelaku produk nya di nengeri Sarawak ila.
Berebak enggau nya, bedau lama ke udah penemuai bala sida ngagai menua Singapura mega enggau tuju muka sebuah kompeni ba baruh Unit Merambu Nengeri dikena ngelakuka produk kayu Sarawak.
Taja pia, haribulan bejalaika pengawa nya bedau ulih dipadahka bala sida kemari.
PUSAKA mega udah munuh enam iku chapi ungkup Ibadah Korban ti udah diagih ngagai 100 iku bala asnaf ke ngelingi Kuching enggau Kota Samarahan.
Tiga iku ari enam chapi nya udah dibunuh di KIPPKS, Kota Samarahan lalu diintu bala pengereja pengawa PUSAKA enggau anak kompeni sida. Berebak enggau nya tiga iku lembu diberi ngagai Surau PUSAKA Kandang Menua Utara, Bintulu, Masjlid Soldadu Darat Malaysia, Penrissen enggau Segedup ditu.
Sama bisi datai kemari Menijar Pemansang Pengawa Dagang KIPPKS, Omar Ali Sepian enggau Chairman Komiti Saudara Kita Bagi Menua Samarahan ngarika Opis Agama Islam Sarawak (JAIS) pampang Kota Smaarahan Nurul Aini Abdullah.