Matematik, Sains diajar dalam BI berengkah ari taun 2020

KUCHING: Opis Menteri Pelajar, Sains enggau Pansik Teknologi optimis program ngajar subjek Matematik enggau Sains ngena Jaku English (BI) ulih berengkah dipejalaika ba nembiak Primari Satu pun taun 2020 di nengeri tu.

Menteri iya, Dato Sri Michael Manyin beterima kasih ngagai bala apai indai laban ti enda mantah program nya dipejalaika ba sekula di nengeri tu.

Nyema program nya dibantah siku apai indai ba sebuah sekula, dia program nya enda dipejalaika ba sekula nya laban nya semina program lalu ukai polisi baka ti kala dipejalaika sebedau tu, ku iya.

“Au, kitai udah sedia (bejadi sereta bejalaika program ngajar subjek Matematik enggau Sains ngena Jaku English ba nembiak Primary Satu berengkah 1 Januari taun baru).

“Kitai deka ngelatih pengajar, berengkah bulan baru. Duit ke dikena udah bisi sereta dikemendarka kabinet nengeri.

“Pegawai Opis Menteri Pelajar udah besedia, kami betemu beberapa kali udah. Nya alai kami chukup arap bendar kitai ulih berengkah bejalaika program pun taun baru,” ku iya.

Manyin mansutka pekara nya lebuh dikerandau ba aum pengarang berita Aum besai Antarabansa MELTA Ke-28 ti diatur Malaysia English Language Teaching Association (MELTA) ba sebuah hotel ditu, kemari.

Dulu ari nya Manyin ngarika Kepala Menteri Datuk Patinggi Abang Johari Tun Openg bejadika pengarang berita Aum besai Antarabansa MELTA Ke-28, ti ngena tema English Languange Education and Society 5.0: Developing Sustainable Literacies, ke diatur berengkah kemari nyentuk ke pagila (13 - 15 Ogos 2019).

Urung 11 juta udah dikemendarka kabinet nengeri dikena ngelatih pengajar enggau nyendiaka kereban ngajar, ku iya.

Taja pia ku iya, program nya enda dikemeran tauka dipejalaika ba Sekolah Jenis Kebangsaan China (SJKC).

“Kitai enda ngemeran tauka bejalaika program tu ba SJKC laban sida iya deka ngena Jaku Mandarin ngajar subjek Matematik enggau Sains.

“Nyetukka sehari tu (kemari) kami nadai nerima seberang bantah, nya alai kitai ngarapka tu berengkah dipejalaika pun taun baru,” ku iya lebuh ngenang pekara nya maya bejaku ba pengerami nya.

Dulu ari nya Manyin madah, lebuh Menteri Pelajar Malaysia Dr Maszlee Malik datai betemu enggau Kepala Menteri Datuk Patinggi Abang Johari Tun Openg kena 24 April 2019, iya nanya nengeri sekalika kitai deka ngambi peluang ngena Jaku English dikena ngajar Matematik enggau Sains di Sarawak.

Maya nya Kepala Menteri madah au, nama kebuah kitai enda nyanggup, nya alai kenyau ari nya kitai nempa kerejasama enggau Opis Menteri Pelajara Malaysia Kuala Lumpur, ku iya.

Baka ti dikenang Manyin sebedau tu program nya deka dipejalaika ba 1,046 sekula primari di serata nengeri tu.

Iya madahka KPM nyendia modul ngajar enggau belajar ari baruh DLP Sarawak ti dipelaba tembu bulan Ogos tu.