Pechara kes saman petenah UggahVernon ditukar haribulan bukai

KUCHING: Pechara kes saman petenah Sapit Kepala Menteri Sarawak Datuk Amar Douglas Uggah Embas ngagai Vernon ke patut disambung kemari ba KortTinggi Kuching udah ditukar haribulan bukai ngambika disebut baru.

Akim Ravinthran N. Paramaguru dulu ari nya kena 13 Jun netapka kemari patut maya nutup jurai.

Taja pia, kort nangguh kes nya sereta nadai madahka nama kebuah.

Kededua piak semina nganjung luyar sida nyadi pengari datai ke kort kitu kemari.

Uggah memfailka saman petenah ngagai Vernon bekaul penerang iya taun siti nyin tadi dalam Grup What’s App PKR State Media laban madahka iya ‘penipu’ enggau ‘pengkhianat’.

Kaban Kunsil Nengeri Bukit Saban nya memfailka kes saman petenah kena 8 Ogos 2018.

Pechara kes saman petenah nya udah berengkah kenyau ari bulan Jun lepas taun siti nyin tadi ke alai enam saksi udah dikangauka luyar Uggah, Sim Hui Chuang enggau Alex Lim Lip Sze ngambika meri penerang naka ke diatu.

Dalam rintai saksi nya, bisi tiga saksi ari pengemeran media.

Balasaksi sama ditanya sentang kaul enggau pengawa sida dalam grup WhatsApp PKR State Media.

Dulu ari nya dalam kort Vernon madah, penerang ti dipansutka iya ti ngumbai Uggah ‘penipu’ enggau ‘pengkhianat’ nyadi timbal ngagai kepada artikel berita dalam portal Dayak Daily.

Vernon tmega m adahka Grup What’s App PKR State Media siti ari c hara ngenataika pemadah kelimpah berandau enggau peranak asal Sarawak.

Vernon ke mangku pengawa nyadi Ketuai Pemadah PKR nengeri udah ngelengkaka pangku pengawa nya kena bulan Mei tu tadi.

Iya diarika Luyar Desmond Kho enggau Simon Siah.