SK Melugu deka ngatur pekit Gendang Pampat kena 5 Oktober

KUCHING: Sekula Primari (SK) Melugu, Sri Aman sekali agi deka ngatur Pekit Gendang Pampat ke diatur Gerempung Apai Indai enggau Pengajar(PIBG) sekula nya.

Pengari pengatur pengerami, Bruno Abu ba penerang iya ngagai Utusan Borneo madah, ke sekali tu, sida enda nagit penyampau tim tang ngelaluka semua orang ke rindu pengawa tu ngambi bagi ba pekit Gendang Pampat ari serata Sarawak.

Ku iya, pekit nya deka diatur kena 5 Oktober, berengkah pukul 8:30 pagi di Dewan Tebuka Sk Melugu.

“Pekit tu deka dipenyadi Kaban Kunsil Nengeri (ADUN) Bukit Begunan

Datuk Mong Dagang sereta digulu kepala pengajar Louise Aom, bala ketuai raban bansa enggau peranak kandang menua nya,” ku iya.

Tambah iya, proses ngundi pesereta deka diatur kena hari maya pekit nya dipejalaika urung jam 8 pagi ba palan ke sama lalu tama enda bebayar.

“Champion deka mai pulai perais mata duit sepenyampau RM1,500, piala, setipiket enggau hamper,” ku iya lalu lumur dua enggau ketiga iya nya RM1,300 enggau RM1,000.

“Lumur empat enggau ke bukai agi deka bulih perais mata duit RM200, setipiket sereta hamper,” ku iya.

Bruno madah ba atur ngambi bagi dalam pekit tu, tetiap tim patut bisi lima ngagai 10 iku orang iya ke datai ari komuniti rumah panjai ke sama tauka orang bukai.

“Ari chara gari ke dikena, pengatur minta bala pesereta meseti ngena ngepan asal bansa Iban enggau kereban pekit patut disediaka pesereta empu,” ku iya lalu timpuh masa pekit entara 3 ngagai 5 minit.

Bejaku silik agi, Bruno nyemetak madah tuju pekit tu diatur dikena ngetanka sebengkah main asal Iban iya nya gendang pampat kelebih agi ditebah maya ngintu pengerami baka Gawai Dayak,nikah, ngelaluka temuai enggau ke bukai.

“Kami andal nengah pekit Gendang Pampat enggau orang ke ngambi bagi nya ulih ngenanka adat enggau main asal bansa Iban nya ngambika enda terus lenyau,” ku iya.

Barang sapa ke deka ngambi bagi ba pekit tu tau betanya ngagai Bruno Abu ba lumur 019-8476128 tauka Louise Aom (0135690500).

Haribulan masuk pekit tu deka ditutup kena 27 September 2019.