Urung empat ikar babas angus ba Meruton-Merudu

SARIKEI: Dipelaba urung empat ikar babas ba jalai Sekolah Jenis Kebangsaan (SJK) Su Hing, MerutonMerudu lengis angus, malam ensanus.

Penusah angus tu nyadi urung jam 7 malam, pia ku Ketuai Opis Pengerara Api enggau Penyah Penusah Sarikei Mahmudin Narudin.

Ku iya, lebuh ke nerima kangau ngenyit urung pukul 7.22 malam, seraban bomba dianjung ngagai palan ke angus nya.

“Palan ke angus nya enda jauh ari jalai besai enggau mega penatai ai.

“Dikena ngerara api,raban bomba udah ngena chara ‘Fire Beater’.

“Api udah mujur dirara sereta tembu dalam timpuh setengah jam lalu nadai pekara ke enda manah bisi nyadi,” ku Mahmudin.

Raban bomba pulai baru ngagai balai pengudah nentuka gaya ba palan ke nyadi nya likun sereta nadai agi kelai deka angus.