Pesta Benak Sri Aman deka diatur kena 27 - 29 September

KUCHING: Pesta Benak Sri Aman ti diatur ninting taun, aun tu deka diatur berengkah 27 ngagai 29 September ke deka datai.

Kaban komiti pengatur ti betuaika Residen Sri Aman, Indit Bangai bisi nemuai meri basa ngagai Sapit Kepala Menteri Datuk Amar Douglas Uggah Embas ba opis iya ditu, meri penerang bekaul enggau aktiviti ti diatur maya nya.

Bisi 11 iti aktiviti udah diperambu ungkup pengerami dagang temuai ke pemadu besai di bagi menua Sri Aman.

Aktiviti nya nyengkaum Regatta, Bazar Ria, Benak Surfing, panggau pemerindang, Ratu Kebaya Nyonya Benak, Miss Tourism Benak, konsert, pemandang pemansang enggau ke bukai.

Kepala Menteri Datuk Patinggi Abang Johari Tun Openg udah dikanggau bejadi pengerami besai nya kena 28 September, urung pukul 2.30 lemai.

Tuai Megai Menua (TYT) Tun Pehin Sri Taib Mahmud dipelaba deka bejadika pengerami nutup kena 29 September urung pukul 11 pagi.