Ngarapka bulih penerang ke chukup sentang pengelenyau David
KUCHING: Morni Edmund Rapi iya nya menyadi Koperal David Edmund Rapi ti diripot lenyau maya gawa ba kandang endur Operasyen Pejarak di Pulau Perak, Kedah kenyau ari 19 Julai tu tadi, bisi bulih penerang ke pemadu baru ari Raban Soldadu Malaysia (ATM) bekaul enggau pengelenyau nya.
Moris amat ngarap nengah pengeran sida sebilik ti deka ke kem soldadu di Alor Setar, Kedah deka meri asil.
Kemari, Moris enggau apai iya Edmund Rapi Idal, Teresa Hamline Neh (indai), enggau Nur Lina Aisyah Edmund Rapi (menyadi indu biak) bekejang ke Kuala Lumpur udah nya terus ke Alor Star, disempulang pemesai pengelikun ari Unit Pengelikun enggau Penerit Adat Nengeri, Zayadi Sebeli.
Tuju Moris tauka Edmund sebilik ngagai kem soldadu nya laban deka ngambi barang Koperal David.
Lalu ungkus belanja penerebai bilun pulai mansang ditanggung Perintah Sarawak, berindik ari nya Morni ngarapka bantu ari perintah nengeri ngagai sida sebilik enda dipolitikka.
Morni ti ngarika sida sebilik meri terima kasih ngagai semua ke udah mantu nyengkaum rayat Sarawak ke udah meri sukung moral ngagai sida.
“Kami amat ngarapka pengeran kami enggau perintah nengeri kin meri asil lalu ngarapka bisi kerejasama manah laban kami nengah chara ke betul datai kin ti bepun ari pengeran kami empu nyentuk ke kami minta bantu enggau bantu perintah nengeri.
“Ngarapka mega pekara enda dipolitikka tu laban enti ukai perintah nengeri sapa agi ke deka mantu kami.
“Terima kasih ngagai Perintah Sarawak, ketuai renggat atas perintah nengeri ti udah mantu nyentuk ke renggat tu. Pia mega ngagai Kepala Menteri, bala pemesai sereta Dato Sri Fatimah, Unit Pengelikun enggau Penerit Adat Nengeri (UKPN) sereta semua rayat Sarawak ke udah meri sukung moral ngagai kami nyentuk ke diatu,” ku Morni bejaku ngarika sida maya aum pengarang berita di Padang Bilun Antarabansa Kuching, kemari.
Aum pengarang berita pasal bantu Perintah Sarawak ngagai orang ti sebilik enggau raban soldadu ke lenyau di Pulau Perak digulu Menteri Pengintu Pengintu Pengelantang Pendiau, Pengelantang Raban Bansa, Orang Indu, Ruang Bilik enggau pemansang Nembiak Mit, Dato Sri Fatimah Abdullah enggau Direktor Unit Unit Pengelikun enggau Penerit Adat Nengeri, Datuk Dr Chai Khin Chung ti nganjung sida lima ngagai padang bilun nya ke deka mupuk ke Kuala Lumur lalu terus ke Alor Setar, Kedah.
Sida lima deka pulai baru ke Sarawak kena 17 Ogos tu, (Hari Enam).
“Kami ngarapka lebuh datai din ulih betemu enggau pemesai ti megai tanggungpengawa sereta ngarapka Kem ulih meri kami penerang pasal pengelanyau dua raban soldadu tu.
“Laban nyentuk ke sehari tu nadai penerang ti betul tauka amat diberi ngagai kededua ruang bilik, bakani tu pengelenyau nya? Nama bansa operasyen ngiga enggau nyelamat ti dipejalaika? Kami (ngelama tu) semina bulih penerang keterubah ti madahka lenyau aja.
“Nya pekara ti dikemeratka kami enti betemu enggau pemesai renggat atas ba kem nya,” ku Morni.
Koperal David Edmund Rapi, 39 taun beasal ari Kampung Baru Cina, Dalat enggau Lans Koperal Moses Logers 25 taun beasal ari Kampung Senibong, Bau diripot lenyau maya gawa ba kandang endur Operasyen Pejarak di Pulau Perak, Kedah kenyau 19 Julai taun tu tadi.
Pengelenyau seduai iya ditemu maya ketuai palan meresa baris sereta ngitung penyampau tubuh raban nya. Teresa, Edmund ti disempulang (kiba) Zayadi ti bekejang ke Alor Setar, Kedah nentuka berita pengelenyau Koperal David deka bulih penerang pemadu baru. Sama bisi (dua ari kiba) Chin enggau Fatimah ti nganjung raban nya ke KIA, kemari.