Mahfuz: Pengaji deka seruran diperesa

Ngambi nitihka atur gaji minimum RM1,100 ti ditetapka perintah nya ungkup semua nitihka pematut

KOTA SAMARAHAN: Jabatan Tenaga Kerja (JTK) Sarawak deka seruran meresa pengaji ngambika sektor peribit di nengeri tu nitihka atur gaji minimum RM1,100.

Sapit Menteri Pengatur Pengereja Pengawa, Datuk Mahfuz Omar madah, kelimpah ari nya JTK mega deka meri penerang enggau garis lalau ngagai pengaji ngambika meri gaji pekereja dibayar bepelasarka pematut.

“Pengaji anang salah peragam laban gaji minimum ti ditetapka perintah nya ungkup semua nitihka pematut.

“Batang gaji endang nitihka pematut, tikas pelajar enggau akademik individu sekalika bepelasarka Setipikit Pengelandik, Diploma, Sarjana enggau ke bukai,” ku iya madah ngagai pengarang berita sepenembu pengerami ‘Jelajah Kerjaya Kenyalang 3.0’ enggau program ‘Karnival Kerjaya’ Renggat Bagi

Menua Samarahan ditu, kemari.

Mahfus madah, iya mega deka ke pekereja berani datai sereta ngaga sebana ngagai JTK nyema bisi pengaji enda nitihka garis lalau gaji ti udah ditetapka.

“Pekereja eanang irau tauka nangi dibuai kereja ketegal meri penerang enggau nama pengaji ngagai JTK.

“Nyema bisi sebana diterima, nya ngemuntangka JTK bejalaika pansik, JTK mega ngelalaika semua penerang diri kita sereta enda dipadahka ngagai pengaji,” ku iya.

Bisi 20 pengaji ti nyendiaka lebih ari 1,000 pengawa puang dalam mayuh industi ti ngambi bagi dalam Program Karnival Kerjaya ti berengkah di Kota Samarahan.

Nangkanka tu program nya deka diatur di Betong, Sibu enggau Miri dikena meri peluang ngagai pengiga kereja bukai ba kandang menua Sibu, Sarikei, Kapit enggau Mukah. — Bernama

Batang gaji endang nitihka pematut, tikas pelajar enggau akademik individu sekalika bepelasarka Setipikit Pengelandik, Diploma, Sarjana enggau ke bukai.

Datuk Mahfuz Omar

Sapit Menteri Pengatur Pengereja Pengawa