Ejensi dagang temuai patut ngelakuka VoA ngagai temuai China enggau India
MIRI: Ejensi dagang temuai dipinta ngambika madah ngagai temuai ari menua China enggau India bekaul pemisi Visa Penatai (VoA) ti dipejalai ditu.
Menteri Muda Dagang Temuai, Seni enggau Main Asal Datuk Lee Kim Shin madahka, pemisi visa nya udah dipejalai ba Padang Bilun Antarabansa Miri enggau pintu penama CIQ Sungei Tujoh, kelebih agi ungkup temuai menua China enggau India sereta temuai di Brunei ti datai ke Malaysia.
“Nya ukai semina dikena ngemuntangka pengawa bejalaika VoA, tang mega nyadi sebagi ari pengawa dikena nambahka penyampau temuai ngambika datai ke Sarawak, enggau Malaysia kelebih agi seriris enggau Taun Ngelawa Malaysia 2020.
Ba Padang Bilun Antarabansa Miri, mayuh penatai ke Miri iya nya ari Singapura laban nya bisi penerebai terus kitu lalu ejensi sereta raban pengemeran dagang temuai ke bisi ditu patut madah ngagai ejensi di Singapura ngambi nentuka temuai ari China enggau India ke deka datai ke Miri lalu ngaga peminta VoA nya dikena ngemuntangka proses penatai sida,” ku iya.
Lee madah munyi nya ngagai media sepengudah nyadi chairman aum bekaul VoA begulai enggau ejensi dagang temuai, Opis Imigresyen Malaysia enggau Opis Kastam ba Padang Bilun Antarabansa Miri ditu, kemari.
Sama bisi datai iya nya Pemangku Residen Miri Abdul Aziz Mohamad Yusuf, Ketuai Operasyen Opis Imigresyen Padang Bilun Antarabansa Miri Pellax Patros sereta pengari ejensi ke bukai.
Ku Lee, kompeni penerebai bilun AirAsia mega patut sama madahka bekaul pemisi VoA nya ngambi ngemuntangka agi pejalai pengawa nya lalu enda nejuka temuai ari menua China tauka India ke ngena servis penerebai nya datai ke Miri ti nadai visa.
Berindik ari nya, Lee mega meri buah penemu ngambika ngena Jaku China dalam pom VoA dikena ngemuntangka agi temuai China lebuh ti ngisi pom ke disediaka nya.
“Tu ngambika sida nenakagi nemu nama ti dipinta dalam pom nya lalu ngemuntangka agi pengawa ngisi pom nya,” ku iya nambah.
Dulu agi ari nya, nitih ku Pellax, kenyau dipejalai kena 15 Julai tu tadi nyentukka kemari, semina siti aja VoA udah dikemendar ungkup temuai ari China.
“Kitai deka terus meri kerejasama sereta servis ti pemadu manah dikena ngelengkas enggau ngemuntangka proses VoA nya ditu,” ku iya nerang.
Nitih ku iya, kenyau ari Januari nyentuk Julai taun tu, bisi 3,171 iku temuai ari China enggau 1,993 temuai ari India dirikodka datai ba Padang Bilun Antarabansa Miri, lalu bisi 4,135 iku temuai ari China enggau 3,099 iku temuai ari India dirikodka datai ba Miri ba taun 2018.
Opis Menteri Dalam Menua (KDN) ba penerang media kena 19 Julai tu tadi madahka, pemisi VoA ungkup temuai ari China enggau India udah dikerembai ba enam pintu penama tambah nyengkaum dua di Miri iya nya Padang Bilun Antarabansa Miri enggau CIQ Sungei Tujoh dalam pengawa ngelakuka Taun Ngelawa Malaysia 2020.
Empat agi iya nya di Padang Bilun Antarabansa Langkawi enggau Komplek Imigresyen, Kastam, Kuarantin sereta Pengelikun Bukit Kayu Hitam di Kedah, Palan Penyangkai Feri Labuan enggau Padang Bilun Antarabansa Sultan Abdul Aziz Shah (Skypark Subang).
VoA nya semina diberi ngagai temuai ari menua China enggau India ti tama ke Malaysia nengah menua ketiga iya nya Brunei, Indonesia, Singapura enggau Thailand aja.