Orang ti diau di Komplek Hamidah Yakub enda dipindah
MIRI: Bala ti diau ba Komplek Pengelantang Pendiau Hamidah Yakub (Komplek Hamidah) deka terus diau ba begunan nya nyentukka bisi jaku tangkan ti dipansutka ke nyuruh sida mindah keluar ke palan ti likun, seraya ti nganti gaya sebun asap tu kurang.
Taja pia, penulung menijer komplek nya Shamsiah Sanai Tahir madahka, sida bedau nerima sebarang jaku tangkan sekalika patut nutup komplek nya lalu mindah ke bukai enda lama, nyentuk gaya sebun asap tu kurang tauka enda.
Bacha Indeks Pengamah Angin (IPU) dirikodka di stesyen Palan Pematih Pengleandik (ILP) Miri ti ba kandang endur enda jauh ari palan nya udah ngerikod IPU 361, iya nya ba tikas ti enda likun.
“Taja sebun asap tebal lalu ba tikas ti enda likun tang sida ke diau ditu semua gerai laban kami enda kena sebun asap nya,” ku iya lebuh ti dikerandau ditu, kemari.
Dikena nyeliahka sebarang penanggul kelebih agi ari sukut pengerai sida ti diau ba palan nya semina dalam komplek aja lalu enda dikemendar keluar tauka ngaga aktiviti luar.
“Kelimpah ari nya, kami seruran nerima penatai ari Pemesai Bomba enggau Penyelamat ti meri kami penerang ke pemadu baru ninting maya,” ku iya seraya nambah bala pemesai nya mega bisi meri sida jaku tangkan nama ti engeman enggau enda patut digaga lebuh sebun asap tu.
Ku iya, nyema pengawa madamka api nya digaga kelalu dampih enggau komplek nya, raban bomba dulu betemu enggau sida dikena nentuka sida likun sereta ba palan ti patut.
Naka ke diatu, bisi tujuh iku aja nembiak ke nguan komplek tu iya nya beumur 8 nyentuk 17 taun, ti diau begulai enggau warden sida.
Lalu ke bukai udah diambi orang ti nguan tauka bala sida sebilik beserimbai enggau kemisi sekula sereta ngintu Hari Raya Haji kena Hari Minggu tu tadi.
Bisi 57 iku nembiak patu balu ti diau ba Komplek Hamidah nya, kelimpah ari 12 iku staf enda nyengkaum menijer enggau penulung menijer.
Komplek Hamidah nya siti ari begunan ti bepalan ba kampung kerapa nya lalu siti ari palan ke agi angus nya enda jauh ari komplek nya,.
Dua buah agi begunan ti dampih enggau kandang endur angus nya Palan Pematih Pengelandik (ILP) Miri enggau Sekula Primari China (SJK) Chung Hua, Tudan ti diau enda jauh enggau Palan Pematau di Tudan ditu.