JKDM mujur ngerampas 15,476 batang insap sereta 63.36 liter ai arak di Miri

MIRI: Opis Kastam Diraja Malaysia (JKDM) mujur ngerampas sepenyampau 15,476 insap enggau 63.36 liter ai arak ari bemacham chap dalam operasyen ba dua palan ditu kemari.

Penyampau barang ke dirampas JKDM sekali tu iya nya urung RM1,604.82 lalu penyampau chukai iya nya RM12,312.61 ungkup kededua kes nya.

Direktor Kastam Nengeri Sarawak Datuk Sharifah Halimah Tuanku Taha madahka operasyen nya mega udah mujur nangkap dua iku lelaki dikena mantu pengawa nasat.

“Kena 13 Ogos urung pukul 1.15 lemai, siti tim raban Unit Penerit Adat Kastam Miri udah datai ngenyit ngagai sebuah palan di Jalai MiriBintulu, Batu 5 Lambir lalu nengah pengawa meresa ti digaga sida udah mujur tetemuka insap ari bemacham chap ti bedau dikemendarka kastam bisi disimpan dalam palan nya.

“Bisi 4,060 batang insap ari bemacham chap ti ngaul penyampau urung RM324.80 enggau penyampau chukai iya nya RM2,962.18,” ku iya madah dalam siti penerang media kemari.

Beserimbai enggau nya, operasyen kedua diatur ba hari ke sebaka urung pukul 7.15 lemai ba sebuah palan di Jalai Sejahtera Desaras 6, Jalai Tudan.

“Asil ari pengawa meresa tim penerit adat nya udah teulihka insap ari bemacham chap enggau ai arak ti dipechaya bedau dikemendarka kastam mega disimpan dalam palan tu.

“Bisi 11,416 batang insap enggau 63.36 liter ai arak ari bemacham chap ti ngaul ungkus urung RM1,280.02 lalu penyampau chukai iya nya RM9,350.43,” ku iya nambah.

Sharifah Halimah madahka kededua orang ti ditangkap nya dipelaba nyimpan insap enggau ai arak ke bedau dikemendarka kastam ba palan sida ke deka dijual ngagai mensia mayuh.

Ku iya nambah, insap enggau ai arak nya diselalaika dalam palan dagang sida ba baruh kaunter mayar palan nya.

Kes tu deka ditasat ari baruh Seksyen 135 Akta Kastam 1967 ke nyema ditemu salah, orang nya ke ditangkap deka ditinggang ukum 10 kali lipat penyampau barang tauka RM100,000 tauka dijil enda kurang ari enam bulan sereta enda ngelui lima taun tauka kededua nya sekali. SIBU: Gaya hari ke angat ti enda ngetu di nengeri tu udah meri empas ngagai palan pun penatai ai mata ti mekalka ai ke Palan Meresi Ai Selangau (LPAS).

Opis Bekal Ai Menua Pesisir (JBALB) bagi menua Sibu nengah gambar ti dikunsika ba laman media rama ‘Facebook’ sida kena Hari Dua, udah mandangka tikas ai ba sungai Batang Mukah, Selangau majak langkang.

Berindik ari pekara tu, nyangka penanggul tu deka ngurangka penyampau pemayuh ai ti dikeluarka ari Palan Meresi Ai Selangau.

Taja pia, JBALB Sibu enggau naka ulih neruska operasyen ngepam ai dikena nentuka bekal ai beresi ngagai peranak di kandang menua ngelingi nya enda tekeruga.

Pia mega, JBALB Sibu seruran deka matau tikas ai ninting maya.

Beserimbai enggau nya, mensia mayuh ditangkan ngambika bekelimat ngena ai lalu sida minta ampun ngagai semua penanggul ti nyadi.