Stesyen ngemata kualiti angin di Miri agi ngerikod IPU ti tinggi
MIRI: Ketetiga stesyen ngemata kualiti angin di Miri terus ngayanka bacha Indeks Pengamah Angin (IPU) ti tinggi kemari.
Nitih ku lama web Opis Rampa Menua (JAS), Palan Pematih Pengelandik (ILP) Miri terus ngerikod bacha IPU ba tikas ti enda likun enggau bacha 364 naka pukul 4 lemai kemari.
Pia mega, stesyen Sekula Primari (SK) Kuala Baram 2 ba kategori pemadu enda manahka pengerai enggau bacha 271 lalu stesyen Miri ba tikas enda manahka pengerai enggau bacha 131.
Taja pan sekeda kandang menua ditu bisi ujan tengah hari kemari tang nya semina enda lama aja ke gaya hari lalu panas baru nangkan ke nya.
Beserimbai enggau nya, Ketuai Opis Bomba enggau Penyelamat Malaysia Zon 6 Miri Penguasa Kanan Bomba I Law Poh Kiong madahka kemari iya nya tinggal siti palan ke endang agi aktif angus ti ngemansutka asap iya nya ba tanah ke diempu orang siku-siku ke enda jauh ari ladang Woodman.
“Asil ari pengawa madamka api kemari (Hari Dua), 263 ikar udah mujur dipadam iya nya urung 80 peratus ari kandang menua ti udah angus nya ke agi berasap iya nya 295 ikar.
“Saritu (kemari) kandang menua bekau ke angus agi ngemansutka asap ti mayuh,” ku Law madah dalam siti penerang iya kemari.
Sapit Kepala Menteri Datuk Amar Douglas Uggah Embas lebuh ti ngelawa palan penusah nya madahka nyema bacha IPU agi ba tikas lebih ari 200, semua sekula di kandang menua ngelingi nya deka ditutup.
“Ari baruh National Haze Management Plan, dia bisi Prosedur Opersyen Standard (SOP) ti madahka nyema IPU udah nyapai bacha 200, dalam timpuh 24 jam Opis Pelajar deka nentuka sekula ditutup,” ku Uggah.
Uggah ke mega chairman Komiti Pengatur Penusah Ngenyit Nengeri madahka ‘mask’ deka disadung ke sekula nyema sebun asap tu terus nyadi.